ހެންވޭރު ވައިލެޓް މަގުގައި ހަދަމުންދާ އިމާރާތަކުން ބިއްލޫރިގަނޑެއް ވެއްޓި، އެ ސަރަހައްދުގައި ޕާކުކޮށްފައި ހުރި 8 ސައިކަލަކައް ގެއްލުން ވެއްޖެއެވެ.
މި ހާދިސާއާ ގުޅިގެން ފުލުހުން ބުނީ، ހެންވޭރުގައި ހަދަމުންދާ އިމާރާތަކުން ބިއްލޫރިގަނޑެއް ވެއްޓި، އެ ސަރަހައްދުގައި ޕާކުކޮށްފައި ހުރި 8 ސައިކަލަކައް ގެއްލުން ވެފައިވާ ކަމުގެ މައުލޫމާތު މިއަދު މެންދުރު 12:49 ހާއިރު ލިބިފައިވާ ކަމަށެވެ. އަދި ފުލުހުން ދަނީ މިހާރު އެސަރަހައްދުގައި ހަރަކާތްތެރިވަމުން ކަމަށް ފުލުހުން ބުނެއެވެ.
ހަދަމުންދާ އިމާރާތަކުން ބިއްލޫރި ގަނޑެއް ވެއްޓި ސައިކަލުތަކަކަށް ގެއްލުން ވެފައިވާއިރު، އިމާރާތްތަކުން އެއްޗެހި ވެއްޓި މީހުންނާއި ތަކެއްޗަށް ގެއްލުން ވުމަކީ މާލޭގައި މިހާރު އާންމުވަމުންދާ ކަމެކެވެ. އެގޮތުން، މަލޭ ގްރޭންޑްގައި މިދިޔަ ޖޫން މަހު ބިއްލޫރި ފައިބާތީ ދަނބުރުއް މަގު (މާލޭ ގްރޭންޑްގެ އިރުމަތީ މަގު) ބަންދުކުރިއެވެ. އަދި މިދިޔަ މޭ މަހު 27 ވަނަ ދުވަހު، މާލެ ގްރޭންޑްގެ ހަތަރު ވަނަަ ފަންގެފިލާއިން ވެއްޓުނު ބިއްލޫރި ގަނޑަކުން ޖެހި މީހަކަށް އަނިޔާވެފައި ވެސް ވެއެވެ.
މީގެ ކުރިންވެސް ވަނީ މާލޭގެ އިމާރާތް ތަކުން އެއްޗެހި ވެއްޓި މީހުންނަށް އަނިޔާވެފައެވެ. އަދި މިދިޔަ އަހަރުގެ ޑިސެމްބަރު މަހުގެ ތެރޭގައި ހަދަމުން ދިޔަ އިމާރާތަކުން ވެއްޓުނު ސިމެންތި ކޮތަޅަކުން ޖެހި ބިދޭސީ ކުޑަ ކުއްޖަކު ވެސް ވަނީ ނިޔާވެފައެވެ.
މަގުތައް މައްޗަށް ވެއްޓޭ ގޮތަށް އެއްވެސް އެއްޗެއް ނުބެހެއްޓުމަށާ، މަސަތަކަތް ކުރާ ތަންތަނުގައި ހާއްސަކޮށް މިފަދަ ކަންކަމަށް ބެލުމަށް މާލެ ސިޓީ ކައުންސިލުން ވަނީ އިލްތިމާސްކޮށްފައެވެ.
