ހއ. ވަށަފަރުން ގެއްލިގެން ހޯދަމުން ދިޔަ އުމުރުން ދުވަސްވީ މީހަކު އެ ރަށު ވޯޓާ ސްޕޯޓްސްގެ ޖެޓްސްކީގައި ނުކުމެ އެމީހާ ސަލާމަތްކޮށްފިއެވެ.
ހއ. ވަށަފަރު ވޯޓާސްޕޯޓްސްގައި މަސައްކަތް ކުރާ ޒުވާނަކު "ދަ ޕްރެސް" އަށް މައުލޫމާތު ދެމުން ބުނީ، މިއަދު ހެނދުނު 6 އިން ފެށިގެން އެރަށުން ގެއްލިގެން ހޯދަމުން ދިޔަ އުމުރުން ދުވަސްވީ މީހަކު މޫދުގައި އޮޔާ ދަނިކޮށް ސަލާމަތްކޮށްފައިވާ ކަމަށެވެ. އެ ހަބަރު ލިބިގެން އެ ރަށުގެ ރައްޔިތުން ނުކުމެ ހޯދަމުން ދިޔަ ކަމަށާއި ރަށުތެރެއިން އެމީހާ ނުފެނުމުން އެމީހާ ހޯދުމަށް މޫދުގައި މަސައްކަތް ކުރި ކަމަށް އޭނާ މައުލޫމާތު ދިނެވެ. ދެން އެމީހާ ފުރަތަމަ ފެނުނީ ގޮނޑު ދޮށުގައި ހުރި ހަސަން މުހައްމަދު ކިޔާ މެދު އުމުރުގެ މީހަކަށް ކަމަށާއި ދެން އެމީހާ ފެނުމުން ބަލާ ދިޔައީ ވަށަފަރު ވޯޓާ ސްޕޯތްސްގެ ޖެޓްސްކީގައި އޭރު ތިބި އަލީ ރިހުޝާން އާއި ރައުފް (ބެރޭ) ކަމަށް އެ ޒުވާނާ ބުނެއެވެ.
"ދަ ޕްރެސް" އަށް މައުލޫމާތު ދެއްވަމުން، ވަށަފަރު ކައުންސިލުގެ ނައިބު ރައީސް އަބްދުއް ރައޫފް ވިދާޅުވީ، ގެއްލިގެން ހޯދަމުން ދިޔަ މީހާ ނުފެނިގެން ރަށުތެރޭގައި ގިނަ ބަޔަކު ނުކުމެ ހެނދުނުން ފެށިގެން މަސައްކަތް ކުރި ކަމަށެވެ. އަދި ގެއްލިގެން ހޯދަމުން ދިޔަ މީހާ އަކީ އުމުރުން 70 އަހަރުވެފައިވާ މީހެއް ކަމަށާއި އެމީހާ ފެނިފައިވަނީ މޫދުން ކަމަށް އޭނާ ވިދާޅުވިއެވެ.
އެމީހާ ފެނިފައިވަނީ މޫދުން އެރަށުގެ ތުނޑީ ކޮޅު ފަހަނައަޅާ ވިލު ދޮޅިއޭ ކިޔުނު ހިސާބުން ކަމަށް ރައޫފް ވިދާޅުވިއެވެ. އެމީހާ ހޯދުމަށް ދެ ޖެޓްސްކީއާއި ލޯންޗެއް ނެރުނު ކަމަށާއި އެމީހާ ފެނިގެން ރަށަށް ގެނައީ އެތަނުން އެއް ޖެޓްސްކީގައި ނުކުތް މީހާ ކަމަށް އޭނާ ވިދާޅުވިއެވެ.
ރޭގެ ފަތިހުގެ ވަގުތެއްގައި އެރަށުމީހެއް ގެއްލިގެން އާއިލާއިން އެކައުންސިލަށް 6:10 ހާއިރު ރިޕޯޓް ކުރުމުން ކައުންސިލުން ރައްޔިތުންގެ އެހީތެރިކަމަށް އެދިފައިވާކަމަށް ރައޫފް ވިދާޅުވިއެވެ. އަދި އެމީހާ ހޯދުމުގެ މަސައްކަތުގައި ރަށުގެ ރައްޔިތުންގެ ފަރާތުން ފުރިހަމަ އެއްބާރުލުން ލިބުނު ކަން އޭނާ ފާހަގަކުރެއްވިއެވެ.
