އަފްޣާނިސްތާނަށް ނިސްބަތްވާ ހަސަން ފަޒީލީއާއި ފާތިމާ ހުސައިނީ، އެދެމަފިރިންގެ 2 އަންހެން ދަރިންނާއެކު ފުރާނަ ސަލާމަތްކުރަން 'ދުވަން' ފެށި 2015 ވަނަ އަހަރުއެވެ. ފިލްމްމޭކަރުންގެ ގޮތުގައި ތިބި ފަޒީލީއާއި ފާތިމާ އެމީހުންގެ ދަރިން ގޮވައިގެން ފުރާނަ އަތްމައްޗަށް ލައިގެން ދުވަން ފެށި ހަނގުރާމަވެރި ތޯލިބާނުންގެ ނުރައްކާ އިންތިހާއަށް ބޮޑުވާން ފެށުމުންނެވެ.
ފަޒީލީގެ އާއިލާއިން އަފްޣާނިސްތާނު ދޫކޮށްލީ، ތޯލިބާނުންގެ ކޮމާންޑަރަކާ ގުޅޭ ގޮތުން އޭނާ ތައްޔާރުކުރި ފިލްމަކާ މެދު ތޯލިބާނުން ހިތްހަމަނުޖެހި، ފަޒީލީ މަރާލަން އުޅުނު ހިސާބުންނެވެ. ފުރާނަ ސަލާމަތްކުރުމަށް ކުރި ދަތުރުގައި ފަޒީލީއާއި ފާތިމާ ދިޔައީ އެ އާއިލާއިން ސަލާމަތުގެ އައްސޭރިއަށް ކުރަމުންދިޔަ ދަތުރުގެ މަންޒަރުތައް ރެކޯޑްކުރަމުންނެވެ.
އެތައް ސަތޭކަ ގަޑިއިރެއްގެ މަންޒަރުތައް ރެކޯޑްކުރަމުންދިޔައީ 3 މޯބައިލް ފޯނަކަށެވެ. މިމަންޒަރުތައް އެއްކޮށްގެން އުފެއްދި ޑޮކިއުމަންޓްރީ ފިލްމަކަށް ކިއަނީ "މިޑްނައިޓް ޓްރެވެލާ"އެވެ.
ތިއޭޓަރުތަކާ ހަމައަށް މިފިލްމު އައިކަމުގައި ވީ ނަމަވެސް، ސަލާމަތުގެ އައްސޭރިއަކަށް ފަޒީލީގެ އާއިލާއިން ކުރަމުންދާ ދަތުރު އަދިވެސް ނުނިމެއެވެ. 2018 ވަނަ އަހަރުގެ އޭޕްރިލް މަހުން ފެށިގެން މިއާއިލާ ދިރިއުޅެމުންދަނީ ޖަރުމަނުވިލާތުގައި ކަމަށްވާއިރު، ފަޒީލީގެ އާއިލާއިން ބޭނުންވަނީ ޖަރުމަނުވިލާތުގައި މަޑުކުރާށެވެ. ނަމަވެސް އެކަމަށް ބޭނުންވާ ލިޔެކިއުންތަކުގެ މަރުހަލާ އަދިވެސް ނުނިމެއެވެ.
ފަޒީލީ ދީފައިވާ ވީޑިއޯ ބަޔާނެއްގައި އޭނާ ބުނެފައިވާ ގޮތުގައި، ފާއިތުވެދިޔަ ދެތިން އަހަރެއްހާ ދުވަހުގެ ތެރޭގައި އޭނާގެ ހަމަ ބުއްދި ފިލާ ނުގޮސް ހުރި އެންމެ ބޮޑު ސަބަބަކީވެސް މި ވީޑިއޯ ޑިކިއުމަންޓްރީގެ މަސައްކަތެވެ. ދިރިހުރުމުގެ ރޫހު އާލާ ކޮށްދިން އެއްޗަކީވެސް މި ފިލްމުކަމަށް ފަޒީލީ ބުނެއެވެ. ކޮންމެވެސް ދުވަހަކުން ކާމިޔާބު ލިބޭނެ ކަމާ، ކޮންމެ ދުވަހަކުން މައްސަލަތައް ހައްލުވެދާނެ ކަމުގެ އުއްމީދު، މި ފިލްމުގެ ޒަރިއްޔާއިން އޭނާއަށް ލިއްބައިދިން ކަމަށް ފަޒީލީ ބުނެއެވެ.
ފަޒީލީއާއި އޭނާގެ އާއިލާ ދަތުރުކުރާ މަންޒަރު އެއްކޮށްގެން ފިލްމު އެޑިޓްކުރި އެމިލީ މެހްދާވިއަން، ފަޒީލީގެ އާއިލާއާއި އެންމެ ފުރަތަމަ ބައްދަލުކުރީ 2015 ވަނަ އަހަރު ތަޖިކިސްތާނުންނެވެ. އެއަށްފަހު ފަޒީލީގެ އާއިލާ ދާ ކޮންމެ ގައުމަކުން ފަޒީލީގެ އާއިޅާއާއި ބައްދަލުކުރާނެ މީހަކު ހަމަޖައްސައެވެ. އަދި ކަމާބެހޭ ފަރާތްތަކުގެ ހުއްދައާއިއެކު، ފަޒީލީގެ އާއިލާއަތުން ލެޕްޓޮޕަކަށް ވީޑިއޯތައް ޓްރާންސްފާކުރުމަށްފަހު އެމިލީ ހުރި ގައުމުކަމަށްވާ އެމެރިކާއަށް ވީޑިއޯތައް ފޮނުވައެވެ.
އެމިލީ ބުނާ ގޮތުގައި މި ފިލްމަކީ ރެފިއުޖީންގެ ކާރިސާ ގެނެސްދިނުމަށް މިހާތަނަށް ނޫސްވެރިންކޮށްފައިވާ މަސައްކަތާ ތަފާތު މަސައްކަތެކެވެ.
ފުރާނަ ސަލާމަތްކުރަން ކުރި ދަތުރުގެ މަންޒަރުތައް ވީޑިއޯ ކުރަމުންދިޔަ ފަޒީލީ ބުނި ގޮތުގައި އޭނާއަށް ކުރިމަތިލާންޖެހުނު އެންމެ ބޮޑު ގޮންޖެހުމަކީ އާއިލާއަށް ހިމާޔަތް ދެމުން، ކްރިއޭޓިވް އާޓިސްޓެއްގެ ގޮތުގައި މަންޒަރުތައް ޝޫޓްކުރަމުންދާންޖެހުނު ޖެހުމެވެ. އާއިލާއަށް ކުރިމަތިލާންޖެހުނު މައްސަލަތައް އިތުރުވި ވަރަކަށް ފިލްމު އިތުރަށް ފުރިހަމަވަމުންދިޔަ ކަމަށާ، ނަމަވެސް އެފަދަ ދަނޑިވަޅެއްގައި އޭނާ ވާންވީ ޑައިރެކްޓަރަކަށް ކަމެއް ނުވަތަ ބަފަޔަކަށް ކަން ކަނޑައެޅުމަށް ދަތިވިކަމަށް ފަޒީލީ ސިފަކުރެއެވެ.
ފިލްމްގެ އެޑިޓާ އަދި ޕްރޮޑިއުސާ އެމިލީ ބުނީ އޭނާގެ މައިގަނޑު އަމާޒަކީ ފިލްމުގައި ސިޔާސީ އެއްވެސް ކުލައެއް ނުޖެއްސުމެވެ.
1 ގަޑިއިރާ 30 މިނެޓަށް ދެމިގެންދާ ހަނގުރާމަ މަތީ ޑޮކިއުމަންޓްރީ ފިލްމް "މިޑްނައިޓް ޓްރެވެލާ'އަށް އާންމުންގެ ބޮޑު ތަރުހީބެއް ދަނީ ލިބެމުންނެވެ.
