ހދ. ނެއްލައިދޫ ފާހަނަތަކުގައި ކެމެރާ ހަރުކޮށްގެން، އަންހެނުން ފާހަނާގައި އުޅުނު ވަގުތު ވީޑިއޯ ކުރި މައްސަލައެއް ބަލަން ފަށައިފިއެވެ.
ފާހަނާތަކުގައި ކެމެރާ ހަރުކޮށްގެން އަންހެންނުން ފާހަނާގައި ތިބޭ ވަގުތު ވީޑިއޯ ކުރާ ކަމަށް ބުނެ، އެރަށު އަންހެނުން ވަނީ އިއްޔެ މުޒާހަރާވެސް ކޮށްފައެވެ. އެކަން ހުއްޓުވުމަށް އަންހެންނުން ނިކުމެ ކުރި މުޒާހަރާގައި، އެމީހުން ވަނީ އެމީހުން ފާހަނާގައި އުޅޭ ވަގުތު ވީޑީއޯ ކުރުމާ ދެކޮޅު ކަމަށް ބުނެ ޕޯސްޓަރުތައް ވެސް ހަދާފައެވެ.
މިކަމާ ގުޅިގެން ފުލުހުން ބުނީ، ނެއްލައިދޫގައި ސުލްހަވެރި އެއްވުމެއް ކުރިއަށް ގެންދިޔަކަން ފުލުހުންގެ ސަމާލުކަމަށް އައިސްފައި ނުވާ ކަމަށެވެ. އަދި މިދިޔަ ބްރާސްފަތި ދުވަހު އަންހެނެއް ފަހަނާގައި ހުއްޓާ މީހަކު ވީޑިއޯ ކުރި ކަމަށް ބުނެ މައްސަލަ ހުށަހަޅާފައިވާ ކަމަށެވެ. އަދި މި މައްސަލަ ތަހުގީގު ކުރުމަށް ފުލުހުން އެރަށަށް ދިޔައިރު، ތުހުމަތު ކުރެވޭ ފަރާތް އެރަށުން ފުރާފައިވާ ކަމަށް މައުލޫމާތު ލިބިފައިވާ ކަމަށް ފުލުހުން ބުނެއެވެ.
އިއްޔެ، ނެއްލައިދޫ އަންހެނުން ނިކުމެ މުޒާހަރާ ކުރީ، ފާހަނާގައި އުޅޭ ވަގުތު ވީޑިއޯ ކުރާ މައްސަލައަށް ހައްލު ނުލިބިގެން ކަމަށާއި، މިކަން ކުރަމުން ގެންދާތާ ދުވަސްކޮޅެއްވެފައިވާ ކަމަށް މައުލޫމާތު ލިބެއެވެ. އަދި މިއީ އެރަށު ޒުވާން ކުދިން ކުރާ ކަމެއް ކަމަށް ބައެއް ފަރާތްތަކުން ތުހުމަތު ކޮށްފައިވާއިރު، ބައެއް މީހުން ފާހާނައިގައި އުޅޭ ވީޑިއޯ އެރަށުތެރޭގައި ދައުރުވާ ކަމަށް ވެސް މައުލޫމާތު ލިބެއެވެ.
