އދ. ތުނޑުފުށީ އައިލެންޑް ރިސޯޓްގައި އޮތް ކޮޅުވެއްޓިއެއްގައި މަސައްކަތް ކުރާ ތިން ބިދޭސީއަކަށް އަނިޔާވެގެން އެއަތޮޅު ހޮސްޕިޓަލުގައި ފަރުވާދޭން ފަށައިފިއެވެ.
ފުލުހުން ބުނީ މިއަދ އިރޮއޮއްސި 18:43 ހާއިރު ތުނޑުފުށީ ރިސޯޓްގައި އޮތް ކޮޅުވެއްޓިއެއްގެ ރޭމްޕް ހިއްލުމަށް ޗެއިން ބްލޮކް ބޭނުންކުރި އިރު، އޭގެ އެއްފަޅި ފެއިލްވެގެން، އެ މަސައްކަތުގައި ރޭމްޕް މަތީގައި ތިބި މީހުން ވިއްސައިގެން ގޮސް ބޯޓުގެ ދަގަނޑުގެ ބައެއްގައި ޖެހިފައިވާ ކަމަށެވެ.
ފުލުހުން ބުނީ މި އެކްސިޑެންޓްގައި އެކަކުގެ އިނގިލިތައް ޗިސްވެ އަނެއް ދެމީހުންގެ ބޮލަށް ވަރަށް ބޮޑަށް އަނިޔާވެފައިވާ ކަމަށް މައުލޫމާތު ލިބިފައިވާ ކަމަށެވެ. އަދި ބޮލަށް އަނިޔާ ލިބުނު ދެމީހުން އިތުރު ފަރުވާއަށް މާލެ ގެންދަން މަސައްކަތް ކުރަމުންދާ ކަމަށާއި، މި ހާދިސާ ތަހުގީގުކުރަމުންދާ ކަމަށް ފުލުހުން ބުނެއެވެ.
