އިންޑިއާގެ ޗީފް އޮފް އާމީ ސްޓާފް ޖެނެރަލް ބިޕިން ރަވަތް ރާއްޖެ ވަޑައިގަންނަވާގޮތަށް ހަމަޖެހިއްޖެއެވެ.
މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނީ، އިންޑިއާގެ ޗީފް އޮފް އާމީ ރާއްޖެއަށް ވަޑައިގަތުމަށް ހަމަޖެހިފައި ވަނީ މާދަމާ ކަމަށާއި އެ ދަތުރަކީ 5 ދުވަހުގެ ދަތުރެއް ކަމަށެވެ. ރާއްޖެއަށް ސްޓާފް ޖެނެރަލް ބިޕިން ރަވަތް ކުރައްވާ ރަސްމީ ދަތުރު ނިންމަވާލައްވާނީ އަންނަ މަހުގެ ހަތަރުވަނަ ދުވަހު ކަމަށް އެމްއެންޑީއެފުން މައުލޫމާތު ދެއެވެ.
މިދިޔަ ޖުލައި މަހުގެ ފަސް ވަނަ ދުވަހު އެމްއެންޑީއެފްގެ ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ވަނީ އިންޑިއާއަށް ރަސްމީ ދަތުރެއްގައި ވަޑައިގެންފައެވެ. މި ދަތުރުގައި ޝަމާލް ވަނީ ބިފިން ރަވަތް އާ ބައްދަލު ކުރައްވާފައެެވެ.
މިދިޔަ އަންގާރަ ދުވަހު އދގެ 74 ވަނަ އާންމު މަޖިލީހުގެ އިސްވެރިންގެ ބައްދަލުވުމުގައި ބައިވެރިވެވަޑައިގަތުމަށް އެމެރިކާގެ ނިއު ޔޯކަށް ކުރައްވަމުން ގެންދަވާ ދަތުރުފުޅުގައި، އިންޑިއާގެ ބޮޑުވަޒީރު ނަރޭންދްރާ މޯދީއާއި ބައްދަލުކުރައްވާ ރައީށް އިބްރާހިމް މުހައްމަދު ސޯލިހް ވަނީ ވާހަކަފުޅު ދައްކަވާފައެވެ. މި ވާހަކަފުޅުގައި ދިވެހިރާއްޖޭގެ ހާރިޖީ ސިޔާސަތު މައިގަނޑު ގޮތެއްގައި ބައްޓަންވެފައި ވަނީ ރާއްޖެއާއި އިންޑިއާ އަދި އިންޑިއާ ކަނޑުގެ ސަރަހައްދުގެ އެހެން ގައުމުތަކާ އެކު އޮންނަ ގުޅުން އިތުރަށް ހަރުދަނާކުރުމުގެ މައްޗަށް ކަމަށް ރައީށް ސޯލިހް ވިދާޅުވިއެވެ.
މި ބައްދަލުކުރެއްވުމުގައި ވާހަކަފުޅުދައްކަވަމުން އިންޑިއާގެ ބޮޑުވަޒީރު ވަނީ، ރާއްޖޭގެ ވެރިކަމާ ރައީސް ސޯލިހު ހަވާލުވެވަޑައިގެންނެވި ފަހުން ދެ ޤައުމުގެ މެދުގައި އޮތް ގުޅުން އިތުރަށް ބަދަހިވެގެން ގޮސްފައިވާކަން ފާހަގަކުރައްވާފައެވެ. އަދި މި މަހުގެ ކުރީކޮޅު ރާއްޖޭގައި ބޭއްވި އައި.އޯ.ސީ.ގެ ބައްދަލުވުމުގެ ކާމިޔާބީއަށް އަލިއަޅުއްވާލައްވާ، މޯދީ ވަނީ ރައީސުލްޖުމްހޫރިއްޔާއަށް މަރުހަބާ ވިދާޅުވެފައެވެ.
މި ބައްދަލުކުރެއްވުމުގައި ރައިށް ސޯލިހާއި އިންޑިއާގެ ބޮޑުވަޒީރު މޯދީ ވަނީ ބައިނަލްއަގްވާމީ މައިދާނުގައި ދެގައުމުން ޝައުގުވެރިވާ ކަންކަމުގައި އިތުރަށް ގުޅުން ބަދަހިކުރެއްވުމާއި ގުޅޭގޮތުން ފުޅާ ދާއިރާއެއްގައި މަޝްވަރާކުރައްވާފައެވެ. އަދި ރާއްޖެއާއި އިންޑިއާއާ ދެމެދު އޮތް ޒަމާންވީ ގުޅުން ކުރިޔަށް އޮތް ދުވަސްތަކުގައިވެސް އިތުރަށް ދަމަހައްޓައި މި ގުޅުން އިތުރު ދާއިރާތަކުން ބަދަހިކުރެއްވުމަށް އުންމީދުކުރައްވާކަމުގައި ރައީސް ވިދާޅުވެފައި ވެއެވެ.
