މިދިޔަ ހުކުރު ދުވަހު މާލޭގައި ހިނގި އަލިފާނުގެ ހާދިސާގައި ހާލުގައި ޖެހުނު މީހުންނަށް އެހީވުމަށް މިނިސްޓްރީ އޮފް އާޓްސް ކަލްޗާ އެންޑް ހެރިޓޭޖުން އިންތިޒާމް ކޮށްގެން 12 ގަޑިއިރުގެ ޝޯއެއް ކުރިއަށް އެބަ ގެންދެއެވެ.
ހެރިޓޭޖް މިނިސްޓްރީން ބުނީ، އަލިފާނުގެ ހާދިސާގައި ގެދޮރުގެއްލި ހާލުގައި ޖެހުނު ފަރާތްތަކަށް އެހީވުމުގެ ގޮތުން ދިވެހި ފަންނާނުން ގުޅިގެން ކުރިއަށްގެންދާ މިއުޒިކް ހަރަކާތް މިއަދު މެންދުރު ފަހު 3:30 އިން މިރޭ ދަންވަރު 3:30 އާއި ހަމައަށް ދަރުބާރުގޭގައި ކުރިއަށްދާނެ ކަމަށެވެ.
މިހާރު ދަރުބާރު ގޭގައި ކުރިއަށްދާ މިއުޒިކް ޝޯ އަށް ވަނުމަށް ދޭން ޖެހެނީ 20 ރުފިޔާ ކަމަށް ހެރިޓޭޖް މިނިސްޓްރީން ބުނެއެވެ.
އެ މިނިސްޓްރީން ބުނީ މި ހަރަކާތުގައި 200 އަށް ވުރެ ގިނަ ފަންނާނުން ބައިވެރިވުމުގެ އިތުރުން އެމްއެންޑީއެފާއި މޯލްޑިވްސް ރެޑް ކްރެސެންޓްގެ ފަރާތުން ކުރިއަށް ގެންދާ ހޭލުންތެރިކަމުގެ ޕްރޮގްރާމްތައް ވެސް ކުރިއަށް ދާނެ ކަމަށެވެ.
މިދިޔަ ހުކުރު ދުވަހުގެ ރޭ އިރާކޮޅު ހެންވޭރުގައި ހިނގި އަލިފާނުގެ ހާދިސާ ހިނގީ ކެމިކަލް ގުދަނެއްގައި ރޯވެގެންނެވެ. އެ ހާދިސާގައި 6 ގެއަކާއި 4 ކެމިކަލް ގުދަން އަނދާ އާޅިއަށް ވެފައިވާއިރު، 130 އަށް ވުރެ ގިނަ އާއިލާ ވަނީ ހާލުގައި ޖެހިފައެވެ. އަދި އެ އާއިލާތަކަށް ވަގުތީ ބޯހިޔާ ވެހިކަމާއި އެމްއެންޑީއެފާއި، ފުލުހުންނާއި، ސިޓީ ކައުންސިލްގެ އިތުރުން ޑިޒާސްޓާ މެނޭޖްމަންޓް އަދި އާންމުންގެ ފަރާތުން އެތައް އެހީތެރިކަމެއް ވަނީ ފޯރުކޮށްދީފައެވެ.
