ޓެރަރިޒަމާއި ނުރައްކާތެރި ހައްދުފަހަނައެޅުމާ ބެހޭ ސެމިނާ އެއް ސިފައިން ބާއްވައިފިއެވެ.
މިއަދު ބޭއްވި ސެމިނާގައި ކުރިއަށް ގެންދިޔަ ސެޝަންތަކުގެ ތެރޭގައި، މޫސުމީ ބަދަލު އަދި ދޭދޭ ގައުމުތަކުގެ ގުޅުންތަކާއި، ސޯޝަލް މީޑިއާ ޓެކްނޮލޮޖީ އަދި އެހެނިހެން ހައިބްރިޑް ނުރައްކާތަކާއި، ދިވެހިރާއްޖޭގެ ހާރިޖީ ސިޔާސަތު އަދި އިންޑިޔާ ކަނޑުގެ އިސްތިރާޖީ މަޝްރަހާއި، ދިވެހިރާއްޖޭގެ ގައުމީ ސަލާމަތަށް ހުރި ނުރައްކާތައް އަދި، ޓެރަރިޒަމާއި ނުރައްކާތެރި ހައްދުފަހަނައެޅުމާ އޭގެ ހައްލާއި ބެހޭ ގޮތުން އެ ދާއިރާތަކާ ގުޅުންހުރި ތަޖުރިބާކާރުން ވަނީ ސިފައިންނަށް މައުލޫމާތު ފޯރުކޮށްދީފައެވެ.
އިސްތިރާޖީ މާހައުލާއި ގައުމީ ސަލާމަތަށް ހުރި ނުރައްކާތަކާއި އަދި އެމްއެންޑީއެފްގެ ކެޕްސްޓޯން ޑޮކްޓަރިންއަށް، ސިފައިންގެ ސީނިއާ އެންލިސްޓެޑް ލީޑަރުން އަހުލުވެރިކުރުމުގެ ގޮތުން މި ސެމިނާ ބޭއްވީ، އެމްއެންޑީއެފް ކޮލެޖު އޮފް ޑިފެންސް އެންޑް ސެކިޔުރިޓީ ސްޓަޑީޒްއިން ބަންޑާރަކޮށީގައެވެ. މި ސެމިނާ ފައްޓަވައިދެއްވީ، އެމްއެންޑީއެފް ކޮލެޖު އޮފް ޑިފެންސް އެންޑް ސެކިޔުރިޓީ ސްޓަޑީޒްގެ ކޮމާންޑިން އޮފިސާ، ބްރިގޭޑިއާ ޖެނެރަލް ވައިޘް ވަހީދުއެވެ.
"ސެމިނާ އޮން ސްޓްރެޓެޖީ، ނޭޝަނަލް ސެކިޔުރިޓީ އެންޑް ޑޮކްޓަރިން" ގެ ނަމުގައި ސިފައިންގެ ސީނިއާ އެންލިސްޓެޑުންނަށް އަމާޒުކޮށްގެން ކުރިއަށްގެންދިޔަ މި ސެމިނާގެ ސެޝަންތަކުގައި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ބައިވެރިވެ ވަޑައިގަންނަވައި ބައިވެރިންނަށް ވަނީ މައުލޫމާތު ހިއްސާކުރައްވާފައެވެ.
މި ސެމިނާ އަކީ ބަވަނަވަމުންދާ ދުނިޔެއާއި ނުތަނަވަސް އަދި ހަމަނުޖެހުންބޮޑު އިސްތިރާޖީ މާހައުލުގައި ސިފައިން މަސައްކަތްކުރާއިރު، ބައިނަލްއަގްވާމީ އަދި ދާހިލީ މަޝްރަޙުގައި ކުރިމަތިވާ ތަފާތު އޮއިވަރުތަކާއި ސަލާމަތީ ގޮންޖެހުންތަކާ ބެހޭ ގޮތުން އަހުލުވެރިކުރުމުގެ ގޮތުން ހިންގި ސެމިނާއެކެވެ. މީގެ އިތުރުން، މި ސެމިނާގައި ސިފައިންގެ އިދާރީ އަދި އޮޕަރޭޝަނަލް އޮނިގަނޑާއި ހިންގުން އިތުރަށް ހަރުދަނާކުރުމުގެ ގޮތުން ކުރެވެމުންދާ މަސައްކަތްތަކުގެ ތެރެއިން އެމްއެންޑީއެފް ކެޕްސްޓޯން ޑޮކްޓްރީންއަށް އަހުލުވެރިކުރުމުގެ ސެޝަންތައް ވެސް ވަނީ ކުރިއަށްގެންގޮސްފައެވެ.
މި ސެމިނާގައި އެމްއެންޑީއެފްގެ ކޮމާންޑް ސާޖަންޓް މޭޖަރުންނާއި، ސާޖަންޓް މޭޖަރުންނާއި، އެންސީއޯ އެޑްވާންސްޑް ކޯހުގެ ބައިވެރިން އަދި ވޮރަންޓް އޮފިސާސް ކޯހުގެ ބައިވެރިން ވަނީ ބައިވެރިވެފައެވެ.
