މޫސުމީ ބަދަލުތަކާ ގުޅިގެން މިފަހަކަށް އައިސް މާލޭގެ އެކި ސަރަހައްދުތަކުގައި ކުރަމުން އަންނަ އިހުތިޖާޖު މިއަދު ވެލާނާގެ ކުރިމަތިމަތީގައި ކުރަން ފަށައިފިއެވެ.
"ސޭވްމޯލްޑިވްސް" ނަމުގައި އިންތިޒާމު ކުރާ މި އިހުތިޖާޖުގެ ބައިވެރިން ގޮވަމުންދަނީ ފަރުތަކާއި ފަޅުތަކާއި ގިރި ފަދަ ތަންތަން ސަލާމަތް ކުރުމަށް ގުދުރަތީ ވަސީލަތްތައް ހިމާޔަތް ކުރުމަށެވެ. އެންމެ ފުރަތަމަ މި އެއްވުން މަދު ބަޔަކާއި އެކުގައި ކުރިއަށް ގެންދިޔަ ނަމަވެސް މިފަހަކަށް އައިސް މި އެއްވުމުގައި ހަކަރާތްތެރިވާ މީހުން އަންނަނީ ގިނަވަމުންނެވެ. މިއަދުގެ އެއްވުމުގެ ފޮޓޯތަކުން ފެންނަ ގޮތުގައި ބައެއް ކުޑަކުދިންވެސް މޫސުމީ ބަދަލުތަކާ ގުޅޭ ތަފާތު އެކި ޝިއާރުތައް ހިމެނޭ ބޯޑުތައް ހިފައިގެން އަންނަނީ އިހުތިޖާޖު ކުރަމުންނެވެ.
މި އިހުތިޖާޖުގެ ބައިވެރިން މީގެ ކުރިން ރައީސް އޮފީސް ކުރިމަތީގައި އިހުތިޖާޖު ކޮށްފައިވާއިރު، ރައްޔިތުން މަޖިލިސް އިދާރާ ކުރިމަތީގައިވެސް ވަނީ އިހުތިޖާޖު ކޮށްފައެވެ. އިއްޔެ އިހުތިޖާޖުކުރީ އެމްޑަބްލިއުއެސްސީ ކަސްޓަމާ ސާވިސް ބިލްޑިން ދޮރުމަތީގައެވެ. ނަމަވެސް އިއްޔެ އިހުތިޖާޖުގެ ބައިވެރިން ގެންގުޅުން ޕްލާސްޓިކު ފުޅިތަކެއް އެމްޑަބްލިއުއެސްސީ ކަސްޓަމާ ސާވިސް ދޮރުމަތީ ބެހެއްޓުމުން ފުލުހުން ވަނީ އެކަމާ ނުރުހުން ފާޅުކޮށްފައެވެ.
ފުލުހުން ބުނީ ސުލްހަވެރި އިހުތިޖާޖުތަކަކީ ފުލުހުން އަބަދުވެސް އެއްބާރުލުން ދޭނެ ކަމެއް ކަމަށެވެ. އަދި ވަކިން ހާއްސަކޮށް މޫސުމީ ބަދަލުތަކާއި ގުޅިގެން ބާއްވާ އެއްވުންތަކާއި ތިމާވެއްޓާއި ގުޅޭ އެއްވުންތަކަށް ފުލުހުންގެ އެއްބާރުލުން ލިބިގެންދާނެ ކަމަށް ފުލުހުން ބުންޏެވެ. ނަމަވެސް ދިވެހިރާއްޖޭގެ ގާނޫނާއި ގަވާއިދުތައް މަނާކުރާ ކަންކަމަށް ފުލުހުން އެއްބާރުލުން ނުދޭނެ ކަމަށް ބުންޏެވެ. އަަދި އެފަދަ ކަންކަމަކީ ފުލުހުން "ތަހައްމަލު" ކުރާނެ ކަންކަން ނޫން ކަމަށްވެސް ފުލުހުންގެ ޓްވީޓުގައި ބުނެފައިވެއެވެ. ފުލުހުން ބުނީ ގާނޫނާއި ގަވާއިދުގެ ތެރެއިން އެފަދަ އެއްވުންތައް ކުރިއަށް ގެންދާ ނަމަ ފުލުހުން އެކަން ކަމާއި ނުބެހޭނެ ކަމަށެވެ.
އެކަމާއި ގުޅިގެން އިހުތިޖާޖުގެ ބައިވެރިން ބުނެފައިވަނީ އެމީހުންގެ ގެންދިޔަ ހުސްފުޅިތަކުގެ ތެރެއިން ތާޒާ ފުޅިތައް އެމްޑަބްލިއުއެސްސީއިން ބަލައިގެންފައިވާކަމަށެވެ.
