ފިނޭންސް މިނިސްޓްރީގެ 25 ބުރީގެ އިމާރާތުގެ މަސައްކަތަށް މި ސަރުކާރުން ފައިސާ ނުދޭތީއާއި، އެ މަޝްރޫއު ކުރިއަށް ނުގެންދަން ނިންމާފައި ވާތީ 462 މިލިއަން ރުފިޔާ ހޯދުމަށް މެލޭޝިއާގެ ކުންފުންޏަކުން އާބިޓްރޭޝަނަށް ހުށަހަޅައިފިއެވެ.
ފިނޭންސް މިނިސްޓްރީގެ 25 ބުރީގެ އިމާރާތް ފުރަތަމަ އަޅަން ނިންމީ ކުރިން ފިނޭންސް މިނިސްޓްރީ ހުރިތަނުގައި މާލޭގައެވެ. ނަމަވެސް ފަހުން އެ އިމާރާތް ހުޅުމާލެއަށް ވަނީ ބަދަލުކޮށްފައެވެ. ސަރުކާރުން އެ މަސައްކަތް ހަވާލުކުރި ޑަބްލިއު ޒެޑް އާރު ޕްރޮޕަޓީ ސެންދްރިއަން ބަރްހާދު ގްރޫޕުން، ގާތްގަނޑަކަށް 30 މިލިއަން ޑޮލަރު (462 މިލިއަން ރުފިޔާ) ހޯދުމަށް އާބިޓްރޭޝަނަށް ހުށަހަޅާފައިވަނީ ހޯމަ ދުވަހުއެވެ.
އެ މައްސަލަ އާބިޓްރޭޝަނަށް ހުށަހެޅީ، އެ ކުންފުނިން މިހާތަނަށް ކޮށްފައިވާ މަސައްކަތަށް މި ސަރުކާރުން ފައިސާ ދީފައި ނުވާތީ އާއި އެ މަޝްރޫއު ކުރިއަށް ނުގެންދަން ސަރުކާރުން ނިންމާފައި ވާތީ ކަމަށް އެ ކުންފުނިން ވަނީ ބުނެފައެވެ.
ހުޅުމާލޭގެ ދެވަނަ ފިޔަވަހީގައި އިމާރާތްކުރުމަށް ނިންމި ފިނޭންސް މިނިސްޓްރީގެ 25 ބުރީގެ އިމާރާތް މެލޭޝިއާގެ ކުންފުންޏާ ހަވާލުކޮށްފައިވަނީ 2016 ވަނަ އަހަރުގެ މާޗް މަހުގައެވެ. އެ ކުންފުންޏާ މި މަސައްކަތް ހަވާލުކުރީ 123 މިލިއަން ޑޮލަރަށެވެ. އަދި އެ ޕްރޮޖެކްޓްގެ 20 ޕަސެންޓް މަސައްކަތާއި ޕައިލިންގެ 60 ޕަސެންޓް މަސައްކަތް ނިމިފައިވާ ކަމަށް އެ ކުންފުނިން ބުނެއެވެ.
މެލޭޝިއާގެ ނޫހެއް ކަމަށްވާ މެލޭ މެއިލް އަށް، ކުންފުނީގެ ޗެއާމަން ޑަޓުކް ސަޒްމީ މިއަހް ވިދާޅުވީ ރައީސް އިބްރާހިމް މުހައްމަދު ސޯލިހުގެ ސަރުކާރުން ރާއްޖޭގެ ވެރިކަމާ ހަވާލުވިފަހުން އެ ޕްރޮޖެކްޓް ހުއްޓިފައިވާ ކަމަށެވެ. އަދި ސަރުކާރުގެ ޖަވާބެއް ހޯދުމަށް މެލޭޝިއާގައި ހުންނަ ރާއްޖޭގެ ހައި ކޮމިޝަނަރު ވިސާމް އަލީ އާއި ސަރުކާރުގެ އިސް ބޭފުޅުންނާ ވާހަކަ ދައްކައިގެންނާއި ސިޓީ ފޮނުވައިގެން ވެސް ހައްލެއް ލިބޭތޯ މަސައްކަތް ކޮށްފައިވާ ކަމަށް އޭނާ ވިދާޅުވެފައިވެއެވެ. މީގެ އިތުުރުން އެ މައްސަލައިގައި ފޮރިން މިނިސްޓަރު އަބްދުﷲ ޝާހިދާއި ފިނޭންސް މިނިސްޓަރު އިބްރާހިމް އަމީރަށް ހުށަހެޅުމުން ޖަވާބެއް ނުދެއްވި ކަމަށް ވެސް އޭނާ ވިދާޅުވެފައިވެއެވެ.
ނަމަވެސް މެލޭޝިއާގައި ހުންނަ ރާއްޖޭގެ ހައި ކޮމިޝަނަރު ވިސާމް އަލީ އާ ހަވާލާދެއްވާ އެ ނޫހުގައި ބުނެފައިވަނީ ސަރުކާރުން އެ ކުންފުންޏާ މި މައްސަލައިގައި ވާހަކަ ދައްކަމުންދާ ކަމަށެވެ.
އެ ކުންފުނިން 30 މިލިއަން ޑޮލަރު ހޯދުމަށް އާބިޓްރޭޝަން މައްސަލައިގެ އިތުރުން، ސަރުކާރުން އެ ޕްރޮޖެކްޓް ހުއްޓާލަން ނިންމައިފި ނަމަ އިތުރު 30 މިލިއަން ޑޮލަރު ހޯދަން ހުށަހަޅާނެކަމަށް ވެސް އެ ކުންފުނީގެ ޗެއާމަން ވަނީ ވިދާޅުވެފައެވެ.
