ފޭނުން ކުރަމުންދިޔަ ދިގު އިންތިޒާރަށް ނިމުމެއް ގެނެސްދީ، މަޝްހޫރު ޑްރާމާ ސީރީޒް "ބްރޭކިންގް ބޭޑް"ގެ ފިލްމްގެ ފުރަތަމަ ޓްރޭލާ ނެޓްފްލިކްސްއިން އާންމުކޮށްފިއެވެ.
މި ފިލްމްގެ ޓްރޭލާގެ ސްނީކްޕީކެއް، އާދީއްތަ ދުވަހު ކުރިއަށްދިޔަ އެމީ އެވޯޑްސް ހަފުލާގައިވެސް ވަނީ ދައްކާލާފައެވެ.
"ބްރޭކިންގް ބޭޑް" ސީރީޒްގެ ފިލްމް ފަށަން ހަމަޖެހިފައިވަނީ މީގެ 6 އަހަރުކުރިން ސީރީޒް ނިންމާލި ހިސާބުންނެވެ. އެއީ އެރޯން ޕޯލް ކުޅެމުންދިޔަ ޖެސީ ޕިންކްމަން ބަދަލު ހިފަން ތެދުވާ ހިސާބުންކަމަށް ބެލެވެއެވެ.
އޭއެމްސީގެ ހިޓް ޑްރާމާ ސީރީޒް "ބްރޭކިންގް ބޭޑް" 2013 ވަނަ އަހަރު ނިންމާލީ މަސްތުވާތަކެތި އުފައްދާ، އޭގެ ވިޔަފާރި ފުޅާދާއިރާއެއްގައި ކުރަމުންދިޔަ ވޯލްޓާ ވައިޓްގެ ކެރެކްޓާ، ޖެސީ ސަލާމަތްކޮށްދޭ ހިސާބުންނެވެ. ސީރީޒް ބެލުންތެރިންނަށް އެންމެ ފަހު ސީނަކަށް ފެނިފައިވަނީ ބޮޑު އިމާރާތެއްގެ ދޮރާށި ވައްޓާލުމަށްފަހު ޖެސީ ގޮސް، އޭނާއަށް ލިބުނު މިނިވަންކަން ފާހަގަކުރާ މަންޒަރެވެ.
"އެލް ކެމީނޯ: އަ ބްރޭކިންގް ބޭޑް މޫވީ"ގައި ފެނިގެންދަނީ ވަރަށް ތަފާތު ޕިންކްމަންއެކެވެ. ޓްރޭލާއިން ފެނިގެންދާ ބައެއް ކަންކަމަށް ބަލާއިރު، ސްކްރީނުން ނުފެންނަ ނުބައިބައި މީހެއްގެ ކިބައިން ބަދަލު ހިފުމަށް ޖެސީ ޕިންކްމަން ތައްޔާރުވެއެވެ.
ސީރީޒް ނިންމާލިއިރު މި ދުނިޔެއާއި ވަކިވި ވައިޓްގެ ކެރެކްޓާ އެއްވެސް ވަރަކަށް ފިލްމުގެ ޓްރޭލާގައި ހިމަނާފައެއް ނުވެއެވެ. ނަމަވެސް ވައިޓްގެ ކެރެކްޓާގައި ވަރުގަދަ ފިލްމަކުން ފެނިގެންދާނެ ކަމުގެ އިޝާރާތެއް، "ބްރޭކިންގް ބޭޑް" ސީރީޒްގައި ވޯލްޓާ ވައިޓްގެ ރޯލު ކުޅުނު ބްރާޔަން ކްރޭންސްޓަން ވަނީ ބުނެފައެވެ.
ވިންސް ގިލިގަން ޑައިރެކްޓްކޮށްފައިވާ "އެލް ކެމީނޯ: އަ ބްރޭކިންގް ބޭޑް މޫވީ" ނެޓްފްލިކްސްގެ އިތުރުން 68 ތިއޭޓަރެއްގައި ރިލީޒްކުރުމަށް ހަމަޖެހިފައިވަނީ އަންނަ އޮކްޓޯބަރު މަހުގެ 11 ވަނަ ދުވަހުއެވެ.
