ބަޑިބޭސް ގެންގުޅުނު މީހަކު ހައްޔަރުކޮށްފިއެވެ.
ފުލުހުން ބުނީ އިއްޔެ ރޭ މެންދަމު 3:50 ހާއިރު ފަރީދީ ގޯޅި ހިލާލީގެ ކައިރީ ހުރި މީހެއްގެ އަމަލުތައް ހުރިގޮތުން ފުލުހުންނަށް ޝައްކު ކުރެވިގެން އޭނާ ހުއްޓުވާ ބަލާ ފާސްކުރި އިރު އޭނާގެ އަތުން ބަޑިބޭސް ކަމަށް ޝައްކު ކުރެވޭ އެއްޗެހި ތަކެއް ފެނިފައިވާ ކަމަށެވެ.
މި މައްސަލައާ ގުޅިގެން އޭނާ ފުލުހުންގެ ބެލުމުގެ ދަށަށް ގެންގޮސް، އޭނާ ދިރިއުޅޭ ގެ ފުލުހުން ވަނީ ބަލާ ފާސްކޮށްފައެވެ. އަދި ބަލާ ފާސް ކުރުމުގެ ތެރޭގައި ބަޑިބޭސް ކަމަށް ޝައްކު ކުރެވޭ އެއްޗެހިތަކެއް އޭނާ ދިރިއުޅޭ ގެއިން ވެސް ފެނިފައިވާ ކަމަށް ފުލުހުން ބުނެއެވެ.
ފުލުހުން ބުނީ މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ 37 އަހަރުގެ ދިވެހި ފިރިހެނަކު ކަމަށެވެ. އަދި އޭނާގެ ބަންދުގެ މުއްދަތު ޖެހުމަށް އިއްޔެ ކްރިމިނަލް ކޯޓަށް ގެންދިއުމުން އެ ކޯޓުން ވަނީ އޭނާގެ ބަންދަށް 7 ދުވަހުގެ މުއްދަތެއް ދީފައެވެ.
ފުލުހުން ބުނީ މި މައްސަލަ އިތުރަށް ތަހުގީގު ކުރަމުންދާ ކަމަށެވެ.
