ހައިވޭގައި 3 ކާރު ޖެހި އެކްސިޑެންޓް ވެއްޖެއެވެ.
މި ހާދިސާއާ ގުޅިގެން ފުލުހުން ބުނީ، މިއަދު 14:15 ހާއިރު މާލެ އިން ހުޅުމާލެ އަށް ދާން އޮންނަ ހައިވޭގައި 3 ކާރު ޖެހި އެކްސިޑެންޓް ވެގެން ފުލުހުންނަށް ހުށަހަޅާފައިވާ ކަމަށެވެ. އަދި މި އެކްސިޑެންޓް ހިނގީ މާލެ އިން ހުޅުމާލެ އަށް ދިޔަ ކާރެއް ހައިވޭ ގައި ކުއްލިއަކަށް މަޑު ކުރުމުން ފަހަތުން އައި ދެ ކާރު ކޮންޓްރޯލް ނުވެގެން ގޮސް ފުރަތަމަ އައި ކާރުގައި ޖެހިގެން ކަމަށް ފުލުހުން މައުލޫމާތުދެއެވެ.
މި ހާދިސާގައި އެއްވެސް މީހަކަށް އަނިޔާވި ކަމުގެ މައުލޫމާތު ލިބިފައި ނުވާއިރު، ފުލުހުން ބުނީ މި މައްސަލަ އިތުރަށް ތަހުގީގު ކުރަމުން ދާ ކަމަށެވެ.
މާލެއާއި، ހުޅުމާލެ ގުޅުވާ، އަޅާފައިވާ ބްރިޖާއި ހައިވޭއަށް އެއް އަހަރު ވެފައިވާއިރު، މާލެ ސަރަހައްދުގައި ހިނގާ ގިނަ އެކްސިޑެންޓްތައް ހިނގަނީ ބްރިޖާއި ހައިވޭގައެވެ. އެގޮތުން، މިދިޔަ އޮގަސްޓަ މަހު 6 ވަނަ ދުވަހު، ބްރިޖް ހައިވޭ އިން ހުޅުމާލެ އަށް ދަތުރުކުރި ކާރަކާއި ސައިކަލެއް ޖެހި އެކްސިޑެންޓެއް ވަނީ ހިނގާފައެވެ.
ބްރިޖް ހައިވޭ ނިމޭ ހިސާބުގައި ހިނގި މި އެކްސިޑެންޓްގައި އަނިޔާވީ ސައިކަލުގައި ތިބި ދެ މީހުންނަށް ކަމަށް ފުލުހުން މައުލޫމާތުދީފައިވާއިރު، ސައިކަލު ދުއްވަން އިން 55 އަހަރުގެ ފިިރިހެން މީހާ އާއި 52 އަހަރުގެ އަންހެން މީހާގެ ކޮނޑު މަށައިގެން ގޮސް އަނިޔާވެފައިވާ ކަމަށް ފުލުހުން ބުނެއެވެ. އަދި ކާރު ދުއްވަން އިން އުމުރުން 43 އަހަރުގެ މީހާއަށް އެއްވެސް އަނިޔާއެއް ނުވާ ކަމަށް ވެސް ފުލުހުން ވަނީ ބުނެފައެވެ.
މި ހާދިސާގައި އަނިޔާވި ދެ މީހުން ހުޅުމާލެ ހޮސްޕިޓަލަށް ގެންގޮސް ފަރުވާ ދީފައިވާ ކަމަށް ފުލުހުން މައުލޫމާތުދޭ އިރު، މި ހާދިސާގައި އަނިޔާވި އަންހެން މީހާގެ ފައި ގޭނިގެން ގޮސް ފަޅައިގެން ދިއުމުގެ ސަބަބުން ފައި ފަހާފައިވާ ކަމަށް އޭނާގެ އާއިލާއިން ވަނީ ބުނެފައެވެ.
