2013 ވަނަ އަހަރު ސީޒަން ފިނާލޭ އާންމުކޮށް ދެއްކި މަޝްހޫރު ޓީވީ ސީރީޒް "ދި އޮފީސް"ގެ ރީބޫޓެއް ވަރަށް އަވަހަށް ފެނިގެން ހިނގައިދާނެ ކަމުގެ ވަރުގަދަ އިޝާރާތެއް އެންބީސީ ޔުނިވާސަލްގެ ޗެއާމަން އޮފް ޑައިރެކްޓް ޓު ކޮންޒިއުމާ ބޮނީ ހެމާ ދީފިއެވެ.
އެމެރިކާގެ އޮފީހެއްގައި މަސައްކަތްކުރާ މުވައްޒަފުންތަކެއްގެ މެދުގައި ހިނގާދާ ހެއްވާ، މަޖާ ހާދިސާތަކެއް ދައްކުވާދޭ ޑްރާމާ ސީރީޒް "ދި އޮފީސް"ގެ ރީބޫޓްއެއް ފެނިދާނެ ކަމުގެ ވާހަކަ ދޭތެރެ ދޭތެރެއިން ފެންމަތިވީ ކަމުގައި ވީ ނަމަވެސް، އަދާޖެހެންދެކަށްވެސް މިކަން ހަގީގަތަކަށް ވެފައެއް ނެތެވެ.
"ދި އޮފީސް" ސްޓްރީމިންގް ރައިޓްސް މިވަގުތު އޮތީ ނެޓްފްލިކްސްގެ އަތުގައެވެ. 2021 ވަނަ އަހަރުގެ ނިޔަލަށް މިކަން އޮތީ މިހެނެވެ. ނަމަވެސް "ދި އޮފީސް"ގެ ބެލެނިވެރި ކުންފުނިކަމަށްވާ އެންބީސީއިންވެސް މިހާރު ދަނީ ޕީކޮކްގެ ނަމުގައި ވީޑިއޯ ސްޓްރީމިންގްގެ ހިދުމަތް ދިނުމަށް ތައްޔާރުވަމުންނެވެ. 2020 ވަނަ އަހަރުގެ މެދެއްހާ ހިސާބުގައި މި ހިދުމަތް ތައާރަފުވެގެންދާނެ ކަމަށް މައުލޫމާތު ލިބެއެވެ.
ހެމާ ބުނީ އެންބީސީއާއި ހަމައަށް "ދި އޮފީސް" އަނބުރާ އަންނައިރު ސްޓްރީމިންގް ސާވިސް މެދުވެރިކޮށް ރީބޫޓްއެއް ދައްކަން ފެށުމަކީ އޭނާގެ އުއްމީދު ކަމަށާ، މިހާރުވެސް އެކަމާ ގުޅުންހުރި މަޝްވަރާތައް ކުރަމުންދާކަމަށެވެ. ބެލުންތެރިންގެ އިތުރުން، "ދި އޮފީސް"ގެ ކާސްޓުގައި ހިމެނޭ ގިނަ ތަރިންވެސް ވަނީ ރީބޫޓެއް ބޭނުންވާކަން ހާމަކޮށްފައެވެ. ކަންމިހެން އޮތް ނަމަވެސް، ގިނަ ބަޔަކު އެ ކެރެކްޓާއަކަށް ތައުރީފުކުރަމުންދިޔަ މައިކަލް ސްކޮޓްގެ ރޯލުން ފެނިގެންދިޔަ ސްޓީވް ކެރަލް، ރީބޫޓްއަކުން ފެނިގެން ދިއުން ދުރުކަމަށް މުނިފޫހިފިލިވުމުގެ ދާއިރާގެ ރިޕޯޓްތައް ބުނެއެވެ.
