ހުޅުމާލޭގެ ދެވަނަދިޔަވަހީގައި ހަދަމުންދާ ހިޔާ ޓަވަރެއްގެ10 ވަނަ ބުރިން ބިދޭސީއެއް ވެއްޓި މަރުވެއްޖެއެވެ.
ފުލުހުން ބުނީ ހުޅުމާލޭގައި ހަދަމުންދާ އިމާރާތެއްގެ 10 ވަނަ ބުރިން ބިދޭސީއެއް ވެއްޓިގެން ރިޕޯޓްކޮށްފައިވަނީ މިއަދު 11:50 ގައި ކަމަށާއި، އެމީހާއަށް ވަގުތުން ހުޅުމާލެ ހޮސްޕިޓަލަށް ގެންދެވުނު ކަމަށެވެ.
ހުޅުމާލެ ހޮސްޕިޓަލުން ބުނީ މިއަދު މެންދުރު 12:00 ހާއިރު ހުޅުމާލޭ ފޭސް ދޭއްގެ އިމާރާތަކުން ބަންގުލަދޭޝް މީހަކު ވެއްޓިގެން ހޮސްޕިޓަލަށް ގެނެސްފައިވާ ކަމަށެވެ. އަދި އޭނާ ގެނެވުނު އިރުވެސް އޮތީ މަރުވެފައިކަމަށާއި، އޭނާގެ ހަށިގަނޑުގެ އެކި ތަންތަން ބިންދައިގެން ދިއުމުގެ އިތުރުން ނޭފަތުން ލޭ އައިސްފައިހުރިކަމަށް ހުޅުމާލޭ ހޮސްޕިޓަލުން ބުނެއެވެ.
އިމާރާތުން ވެއްޓި މަރުވެފައިވަނީ 37 އަހަރުގެ މީހެކެވެ. ފުލުހުން ބުނީ މި މައްސަލަ ބަލަމުންދާކަމަށް ފުލުހުން ބުނެއެވެ.
މިއީ އިމާރާތުގެ މަސައްކަތް ކުރަމުންދަނިކޮށް، ބިދޭސީއެއް ވެއްޓިގެން ފުލުހުންނަށް ރިޕޯޓްކުރި ތިން ވަނަ ފަހަރެވެ. މީގެ ކުރިން ވެސް ހުޅުމާލޭގައި ހަދަމުންދާ އިމާރާތްތަކުން ބިދޭސީން ވެއްޓިގެން އަނިޔާލިބިފައިވާ އިރު، މިފަދަ ހާދިސާއެއްގައި އެކަކު މަރުވެފައިވެއެވެ.
