އެމެރިކާގެ ޓެރަރިސްޓުންގެ ލިސްޓުގައި ދިވެއްސެއް

އައިމިނަތު ޝަމާ އަބްދުﷲ 11 September 2019, 17:39
America ge Terroristun ge listugai dhivehseh
ދީނީ ހަރުކަށި ޖަމާއަތެއްގެ ބަޔަކު

އެމެރިކާ އިން ޓެރަރިސްޓުންގެ ގޮތުގައި ކަނޑައަޅާ މީހުންގެ ލިސްޓުގައި ދިވެއްސަކު ހިމަނައިފިއެވެ. މިއީ މި ލިސްޓުގައި ދިވެއްސެއްގެ ނަން ހިމެނި ފުރަތަމަ ފަހަރެވެ.

މި ލިސްޓަކީ 2001ވަނަ އަހަރުގެ ސެޕްޓެމްބަރު 11ގައި ދިން ޓެރަރިސްޓު ހަމަލާއަށް ފަހު ހަދަން ފެށި ލިސްޓެކެވެ. މި ލިސްޓުގައި ހިމަނާފައިވަނީ މުހައްމަދު އަމީނު ނަމަކަށް ކިޔާ ދިވެއްސެކެވެ. އެމެރިކާއިން ބުނެފައިވާ ގޮތުގައި މި މީހާއަކީ އައިސިސްއަށް މަސައްކަތް ކޮށްދޭ މީހެކެވެ. އަދި އޭނާއަކީ ސީރިއާއާއި އަފްގާނިސްތާނުގައިވެސް ވަރަށް އިސްކޮށް އައިސިސްގެ ކަންކަމުގައި ހަރަކާތްތެރިވާ މީހެއް ކަމަށް އެމެރިކާއިން ބުނެއެވެ.

އަމީންއާ ގުޅޭގޮތުން އެމެރިކާއިން އިތުރަށް ބުނީ އޭނާއަކީ ސީރިއާގެ ހަނގުރާމައަށް މީހުން ފޮނުވުމުގައިވެސް މީގެކުރިން ވަރަށް އިސް ދައުރެއް އަދާކޮށްފައިވާ މީހެއް ކަމަށެވެ. ނަމަވެސް މިހާރު މީހުން ހަނގުރާމައަށް ފޮނުވަނީ އަފްގާނިސްތާނަށް ކަމަށްވެސް ބުނެފައިވެއެވެ. އަދި އޭނާއަކީ އައިސިސްގެ އިރާގު ގޮފި ކަމަށްވާ (އައިސިސް - ކޭ)އަށް ހަނގުރާމަވެރިން ރެކްރޫޓު ކުރާ މީހެއް ކަމަށްވެސް އެމެރިކާއިން ބުނެފައިވެއެވެ.

އެމެރިކާއިން އިތުރަށް ބުނެފައިވަނީ އަމީންއާ އޭނާގެ ބައިވެރިން ވެގެން މިދިޔަ އޭޕްރީލް މަހާއި ހަމައަށްވެސް އައިސިސްއަށް މީހުން ހޯދުމަށް ވަރަށް ހަރަކާތްތެރިކަމާއި އެކުގައި މަސައްކަތް ކޮށްފައިވާ ކަމަށެވެ. އައިސިސްއަށް މީހުން ހޯދުމަށް ހަފްތާއަކު 10 ބައްދަލުވުމެއް ބާއްވާ ކަމަށްވެސް އެމެރިކާއިން ބުނެއެވެ. އަދި އޭނާ އެފަދަ ބައްދަލުވުންތައް މާލޭގެ އެކި ސަރަހައްދުތަކުގައި ބާއްވާ ކަމަށާއި ބައެއް ބައްދަލުވުންތައް އޭނާގެ ގޭގައި ވެސް ބާއްވާ ކަމަށް އެމެރިކާއިން ބުނެއެވެ.

އެމެރިކާއިން ބުނީ އަމީންއާ އޭނާގެ ބައިވެރިން ރާއްޖޭގައި ހަރަކާތްތެރިވާ ގޭންގުތަކުގެ މީހުން އައިސިސްއަށް ރެކްރޫޓު ކުރުމުގެ މަސައްކަތްވެސް ކުރަމުންދާ ކަމަށެވެ.

ޚިޔާލު ފާޅުކުރައްވާ
ފޮނުވި ހިޔާލަށް ވަރަށް ބޮޑަށް ޝުކުރިއްޔާ! ރިވިއު ކުރުމަށް ފަހު ޝާއިއު ކުރާނެ!