ހަތިޔާރާ އެކު ސިފައިން މާލޭ މަގުމަތީގައި ހަރަކާތްތެރިވާން ފަށައިފިއެވެ.
މިކަމާ ގުޅިގެން އެމްއެންޑީއެފްގެ މީޑިއާ އޮފިޝަލް ވިދާޅުވީ، މާލޭ މަގުމަތީގައި ސިފައިން ހަތިޔާރާ އެކު ހަރަކާތްތެރިވަމުން ދަނީ އެމްއެންޑީއެފުން ކުރިއަށް ގެންދާ އޮޕަރޭޝަނެއްގައި ކަމަށެވެ. ނަމަވެސް، މި އޮޕަރޭޝަނާ ބެހޭ އިތުރު އެއްވެސް މައުލޫމާތެއް އެމްއެންޑީއެފުން ހާމަކޮށްފައެއް ނުވެއެވެ.
އެމްއެންޑީއެފުން މިރޭ ހަތިޔާރާ އެކު އޮޕަރޭޝަނެއް ފަށާފައިވާއިރު، ފުލުހުން ވެސް ދަނީ، މިއަދު ހަވީރުއްސުރެ، ހާއްސަ އޮޕަރޭޝަނެއް ހިންގަމުންނެވެ. ފުލުހުންގެ އޮޕަރޭޝަނަކީ، މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބެލުމަށް އުފައްދާފައިވާ ކޮމިޝަނުން ތަހުގީގު ކުރަމުންދާ މައްސަލަތަކާ ގުޅިގެން އެ ކޮމިޝަނުން ބަލާ ފާސްކުރަން ބޭނުންވާ ތަންތަނާއި، މީހުން ބަލާ ފާސްކުރުމަށް ހިންގާ އޮޕަރޭޝަނެކެވެ.
އެމްއެންޑީއެފުން ކުރިއަށް ގެންދާ އޮޕަރޭޝަނަކީ ފުލުހުންގެ އޮޕަރޭޝަނާ ގުޅުމެއްވާ އޮޕަރޭޝަނެއްތޯ ނުވަތަ ނޫންތޯ އެހުމުން ވެސް އެމްއެންޑީއެފުން އެކަން ކަށަވަރު ކޮށްދީފައެއް ނުވެއެވެ. އަދި މި އޮޕަރޭޝަނާއި ބެހޭ ތަފްސީލު ފަހުން ހާމަކުރާނެ ކަމަށް ވެސް އެ ފަރާތުން ބުނެއެވެ.
