ފިލްމު ރިލީޒްކުރި ފުރަތަމަ ހަފުތާ ބަންދުން ލިބުނު 185 މިލިއަން ޑޮލަރާއެކު ބޮކްސް އޮފީސް ޗާޓުގެ 1 ވަނަ މަގާމު، ވޯނާ ބްރޯސްއާއި ނިއު ލައިންގެ "އިޓް: ޗެޕްޓާ ޓޫ" އިން ކަށަވަރުކޮށްފިއެވެ.
2017 ވަނަ އަހަރު ރިލީޒްކުރި "އިޓް" އެޅުވި ހަފުތާ ބަންދަށްވުރެ ޓިކެޓްގެ ވިޔަފާރި ދަށްވި ކަމުގައި ވީ ނަމަވެސް، ބިރުވެރިފިލްމުތަކުގެ ތާރީހުގައި ދުށް 2 ވަނައަށް އެންމެ ކާމިޔާބު ފިލްމުގެ ރެކޯޑް ހޯދާފައިވަނީވެސް "އިޓް: ޗެޕްޓާ ޓޫ" އިންނެވެ. މިއީ "ދަ ކިޗަން"، "ގޮޑްޒިލާ: ކިންގް އޮފް ދަ މޮންސްޓާޒް" އާއި "ޝާފްޓް"ގެ ނާކާމިޔާބީއާއިއެކު ވޯނާ ބްރޯސްއަށް ކޮންމެހެން ބޭނުންވެފައި އޮތް ކާމިޔާބީއެއް ކަމަށް ފިލްމީ ދުނިޔޭގެ ޚަބަރުތައް ބުނެއެވެ.
ފިލްމު ބެލި ފަރާތްތަކުން ބުނާ ގޮތުގައި 2017 ވަނަ އަހަރު ރިލީޒްކުރި ފުރަތަމަ ބައިހާ "އިޓް: ޗެޕްޓާ ޓޫ" ޝައުގުވެރިއެއް ނޫނެވެ. ނަމަވެސް ފިލްމު ބެލި ފުރާވަރު އުމުރުގެ ކުދިންނާ ޅަ، ޒުވާން ކުދިންގެ މެދުގައި މި ފިލްމުގެ މަގުބޫލުކަން ވަކި ދެރަ ނޫންކަމަށްވެސް މުނިފޫހިފިލުވުމުގެ ދާއިރާގެ ޚަބަރުތައް ބުނެއެވެ.
ފިލްމަށް ލިބޭ ތަރުހީބު ކުޑަވުމުގެ އެންމެ ބޮޑު އެއް ސަބަބަކީ ފިލްމުގެ ދިގުމިން ކަމަށް ބައެއް ފަރާތްތަކުން ބުނެއެވެ. "އިޓް: ޗެޕްޓާ ޓޫ" އަކީ 2 ގަޑިއިރާ 50 މިނެޓުގެ ފިލްމެކެވެ. މިއީ "އިޓް" ފިލްމަށް ވުރެ 30 މިނެޓް އިތުރު ވަގުތެކެވެ.
