އެޕަލް ކުންފުނީގެ އެންމެ ފަހުގެ އުފެއްދުންތަކަށް ހާއްސަކޮށްގެން މިމަހުގެ 10 ވަނަ ދުވަހު އެކުންފުނިން ކުރިއަށް ގެންދާ ހާއްސަ އިވެންޓް ޔޫޓީއުބް މެދުވެރިކޮށް ވަގުތުން ބަލާލުމުގެ ދައުވަތު، އެޕަލްގެ ފޭނުންނަށް ހުޅުވާލައިފިއެވެ.
އެމެރިކާގައި ހުންނަ އެޕްލަގް މައި އިދާރާގެ ސްޓީވް ޖޮބްސް ތިއޭޓަރުގައި ކުރިއަށްދާ މި ހާއްސަ އިވެންޓްގެ ލައިވް ކަވަރޭޖް ބްރޯޑްކާސްޓްކުރުމަށް އެޕަލްއިންވަނީ ހާއްސަ ޔޫޓިއުބް ޕޭޖެއްވެސް ހަދާފައެވެ.
މި އިވެންޓްގައި އެޕަލް ކުންފުނީގެ އާ ފޯނު މޮޑެލްތަކެއް ހުށަހެޅިގެންދާނެއެވެ. އެއީ އައިފޯން 11، 11 މެކްސް އަދި 11 ޕްރޯއާއި 11އާރް ކަމަށް ޚަބަރުތައް ބުނެއެވެ. މީގެ އިތުރުންވެސް އެޕަލްގެ އުފެއްދުންތައް މެދުވެރިކޮށް ލިބޭނެ އާ ހިދުމަތްތަކާ، އެޕަލްގެ އިތުރު ގެޖެޓްތައްވެސް މި އިވެންޓްގައި ހުށަހެޅިގެންދާނެ ކަމަށް ޓެކްނޮލޮޖީގެ ޚަބަރުތައް ބުނެއެވެ.
ވާވޭއާއި ސަމްސަންގްގެ ވާދަވެރިކަމާއެކު އެޕަލްގެ ވިޔަފާރިއަށް ގޮންޖެހުންތަކެއް ކުރިމަތިވަމުންދާއިރު، އެޕަލް ކުންފުނިންދަނީ އެކުންފުނީގެ އާ އުފެއްދުންތައް އާންމުންނާ ވީހާވެސް ގާތުން މާކެޓްކޮށްދިނުމަށް އެކި މީޑިއަމްތަކުގައި އެޕަލް އިވެންޓްތައް ބްރޯޑްކާސްޓްކުރަމުންނެވެ. އެގޮތުން އެޕަލް ކުންފުނިންވަނީ އެކުންފުނިން މިދިޔަ އަހަރު "ގެދާ އަރައުންޑް" ގެ ނަމުގައި ކުރިއަށް ގެންދިޔަ ހާއްސަ އިވެންޓް ޓްވިޓާގައި ލައިވްކޮށްފައެވެ. ނަމަވެސް މިއަހަރުގެ އިވެންޓް ޔޫޓިއުބްގައި ވަގުތުން ސްޓްރީމްކުރާއިރު، މިއީ އެޕަލްއިން ޔޫޓިއުބް ޕްލެޓްފޯމްގައި މިއިވެންޓް ބްރޯޑްކާސްޓްކުރާ ފުރަތަމަ ފަހަރުކަން ފާހަގަކުރަންޖެހެއެވެ.
