ޗައިނާގައި ދިރިއުޅެމުންދާ ވީގޫރު ދަރިކޮޅުގެ މުސްލިމުންނާ މެދު އެގައުމުގެ ކޮމިއުނިސްޓް ސަރުކާރުން އަމަލުކުރަމުންދާ ގޮތާ މެޗު އެގައުމު ޖަވާބުދާރީ ކުރުވުމަށް ގައުމުތަކަށް ބާރު އެޅުއްވުމުގެ ގޮތުން، މިމަހު އޮންނަ އދގެ 74 ވަނަ އާންމު ޖަލްސާގެ ބޭނުން ހިއްޕަވާނެކަމަށް އެމެރިކާގެ ހާރިޖީ ވަޒީރު މައިކް ޕޮމްޕޭއޯ ވިދާޅުވެއްޖެއެވެ.
ވީގޫރު ދަރިކޮޅުގެ މުސްލިމުންނަށް ޗައިނާއިން ކުރިމަތިކުރަމުންދާ ފިއްތުންތައް ހުއްޓުވުމަށް އެމެރިކާއިން ކުރަމުންދާ މަސައްކަތްތަކާ ގުޅިގެން ދެންނެވުނު ސުވާލަކަށް ޖަވާބު ދެއްވަމުން ޕޮމްޕޭއޯ ވިދާޅުވީ، މިމަސައްކަތަށް އެހެން ގައުމުތަކުގެ އެއްބާރުލުމާ އެހީތެރިކަން ހޯދުމަށް އދގެ އާންމު ޖަލްސާގެ ތެރެއިން ގިނަ މަސައްކަތްތަކެއް ކުރައްވާނެ ކަމަށެވެ.
އެމެރިކާއިން ބޭނުންވަނީ ވީގުރު މުސްލިމުންނަށް މިނިވަންކަން ހޯދާދޭން ކަމަށް ޕޮމްޕޭއޯ ވިދާޅުވިއެވެ. ޗައިނާއާއި އެމެރިކާއާއި ދެމެދު ބޮޑެތި ގޮންޖެހުންތަކެއް ހުރި ނަމަވެސް، މިމައްސަލައަކީ ބައެއްގެ ކިބައިން ނިގުޅައިނުގަނެވޭނެ ހައްގުތަކަކާ ގުޅިފައިވާ މައްސަލައެއްކަން ޕޮމްޕޭއޯ ވަނީ ފާހަގަކުރައްވާފައެވެ.
ވީގޫރު މުސްލިމުންނަށް ޗައިނާއިންގެ ކޮމިއުނިސްޓް ސަރުކާރުން ދެމުންދާ ލާއިންސާނީ އަނިޔާތަކަކީ، މި ގަރުނުގައި ދުނިޔޭގައި ޖެހޭނެ އެންމެ ވަރުގަދަ ލައްގަނޑަށްވުން އެކަށީގެންވާކަމަށްވެސް ޕޮމްޕޭއޯވަނީ ސިފަކުރައްވާފައެވެ.
ޕޮމްޕޭއޯގެ ވާހަކަފުޅުތަކާ ގުޅިގެން ޗައިނާއިން އަދި ވަކި އެއްޗެއް ހާމަކޮށްފައެއް ނުވެއެވެ.
ޗައިނާގައި ދިރިއުޅެމުންދާ ވީގޫރު ދަރިކޮޅުގެ މުސްލިމުންނާއި މެދު އެ ގައުމުން އަމަލު ކުރަމުންދާ ގޮތަކީ އިންސާނިއްޔަތުކަމަށް އޮތް ލަދެއް ކަމަށް މުސްލިމުން ސިފަކުރެއެވެ. ޗައިނާގެ ސަރަހައްދެއްގައި މިލިއަނަކަށްވުރެ ގިނަ މުސްލިމުން "ހައްޔަރުކޮށްގެން" އުޅޭ އުޅުން ކުށްވެރިކޮށް، އެތައް ބަޔަކު ދަނީ ޗައިނާ ބޮއިކޮޓްވެސް ކުރަމުންނެވެ. ޗައިނާގެ ހުޅަނގުގެ ސަރަހައްދުތަކުގައި ދިރިއުޅެމުންދާ ތުރުކީ ނަސްލުގެ ވީގޫރު މުސްލިމުންނަކީ، ވަކި އުސޫލެއްގެ ދަށުން ކަނޑައަޅާފައިވާ ކަންތައްތަކެއް ގަބޫލުކުރަން މަޖުބޫރުވެ، ބޮޑެތި ފިއްތުންތަކަކާއި ކުރިމަތިލާންޖެހިފައިވާ އާބާދީއެކެވެ.
ޗައިނާގެ ޝީންޖިއާންގް ސަރަހައްދުގައި ވީގޫރު ދަރިކޮޅުގެ 10 މިލިއަނެއްހާ މުސްލިމުން ދިރިއުޅެމުންދާކަމަށް މައުލޫމާތު ލިބެއެވެ. ނަމަވެސް އިސްލާމް ދީނުގެ ފަރުޟުތަކާއި، ވާޖިބުތަކުގެ އިތުރުން ސުންނަތަށް އުޅުންވެސް ޗައިނާގެ ބައެއް ސަރަހައްދުތަކުގައި ވަނީ މަނާކޮށްފައެވެ. ޗައިނާގައި ނަމާދުކޮށް ރޯދަ ހިފުމުގެ އިތުރުން ތުނބުޅި ބެހެއްޓުމާއި ބުރުގާ އެޅުންފަދަ ކަންކަމަކީ އެކަމެއް ކުރުމުގެ ސަބަބުން ހައްޔަރު ކުރުމުގެ ބިރާއި ކުރިމަތި ކުރުވާ ކަމަކަށް އޮންނަނީ ވެފައެވެ. މީގެ އިތުރުން އިސްލާމީ ތައުލީމު ފޯރުކޮށްދޭ ތަންތަނާއި ގިނަ އަދަދެއްގެ މިސްކިތްތައްވެސް ޗައިނާގެ ކަމާއި ބެހޭ ފަރާތްތަކުން ދަނީ ބަންދުކުރަމުންނެވެ.
