ރާއްޖެ ލާމަރުކަޒީ ވެގެން ދާއިރު އަންހެންގެ ހިއްސާ ވަރަށް ބޮޑަށް އިތުރުކުރަން ޖެހިފައިވާ ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ނައިބު ރައީސް މިހެން ވިދާޅުވީ މޯލްޑިވްސް ގާލް ގައިޑް އެސޯސިއޭޝަންގެ 21 ވަނަ ނޭޝަނަލް ޕެޓްރޯލް ލީޑާސް ތަމްރީން ކޭމްޕު ނިންމުމުގެ ގޮތުން ކ. މާފުށީގައި މިއަދު ހަވީރު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. މި ރަސްމިއްޔާތުގައި ނައިބު ރައީސް ވަނީ، ގާލް ގައިޑު ކުދިންނަށް އެ ކޭމްޕު ތެރެއިން ލިބިގެން ދިޔަ ތަމްރީނުތައް އަދި ފިލާވަޅުތައް ދަސްކުރެވި، ކޮންމެ ކަމަކީ މުސްތަގުބަލުގައި ބޭނުން ކުރާނެ ކަންތައް ތަކެއް ކަމުގެ ޔަގީންކަން އޮތް ކަމަށް އެމަނިކުފާނު ފާހަގަ ކުރެއްވިއެވެ.
ނައިބު ރައީސް ވިދާޅުވީ، އަންހެން ބޭފުޅުންނަކީ މުޅި ގައުމު ތަރައްގީ ވެގެންދާއިރު އެމަސައްކަތުގައި ދެބައިކުޅައެއްބައި ހިއްސާކުރަންޖެހޭ ބައެއް ކަމަށާ އެހެންކަމުން، ރާއްޖެ ލާމަރުކަޒީ ނިޒާމަކަށް ދަތުރު ކުރަމުންދާއިރު އަންހެނުންގެ ހިއްސާ ވަރަށް ބޮޑަށް އިތުރުކުރަން ޖެހޭ ކަމަށެވެ.
ކޭމްޕު ނިންމުމުގެ ރަސްމިއްޔާތުގައި ނައިބު ރައީސް ދެއްކެވި ވާހަކަފުޅުގައި، މުސްތަގުބަލުގައި ދިރިއުޅުމަކާ ކުރިމަތިލާއިރު ވެސް އަމިއްލައަށް ކަންތައްތައް ކުރަން ދަންނަ، ހުނަރުވެރި ބަޔަކަށް ގާލް ގައިޑް ކުދިން ވާންޖެހޭކަމުގައި ވިދާޅުވިއެވެ. އަދި އެހެން މީހުންނާއެކު މަސައްކަތް ކުރާއިރު އަބަދުވެސް އޯގާތެރިކަން އިސްކުރުމާ، އެހެން މީހުންނަށް އަބަދުވެސް ހެޔޮއެދިގެން ކުލުނާއެކު މަސައްކަތް ކުރެވޭނެ ފަދަގޮތަކަށް ވިސްނުން ބަހައްޓަން ދަސްކުރަން ޖެހޭ ކަމުގައި ނައިބު ރައީސް ވިދާޅުވިއެވެ.
