ވޮއްމުލި ރިސޯޓުން ސްނޯކްލިން އަށް ދިޔަ ފަތުރުވެރިޔަކު މަރުވެއްޖެއެވެ.
މި ހާދިސާއާ ގުޅިގެން ފުލުހުން ބުނީ، ވޮއްމުލި ރިސޯޓުން ސްނޯކްލިން އަށް ދިޔަ ފަތުރުވެރިޔަކު މަރުވެފައިވާ ކަމުގެ މައުލޫމަތު މިއަދު 11:50 ހާއިރު ފުލުހުންނަށް ލިބިފައިވާ ކަމަށެވެ. އަދި މަރުވެފައިވަނީ އުމުރުން 43 އަހަރުގެ އެމެރިކާ ފަތުރުވެރިއެއް ކަމަށް ފުލުހުން މައުލޫމާތު ދެއެވެ.
ފުލުހުން ދަނީ މި މައްސަލައާ ގުޅިގެން އިތުރަށް ބަލަން ޖެހޭ ކަންކަން ބަލަމުންނެވެ.
ސްނޯކްލިން އަށް ދިޔަ ފަތުރުވެރިޔަކު މަރުވެފައިވާއިރު، ރާއްޖޭގެ ކަނޑުގެ ސަރަހައްދަށް ފީނަން ފައިބާ ފަތުރުވެރިންނަށް މަދުން ނަމަވެސް މިފަދަ ހާދިސާތައް ދަނީ ކުރިމަތިވަމުންނެވެ. އެގޮތުން، މިދިޔަ އޮގަސްޓް 17 ވަނަ ދުވަހު ކަނޑޫމާ ތިލަ ކައިރައަށް ފީނަން ފޭބި ފަތުރުވެރިޔަކު ވަނީ ގެއްލިފައެވެ. 22 މީހުންނާ އެކު ފީނަން ފޭބި ފަހުން ހަބަރެއް ނުވެގެން ހޯދަމުން ދަނީ އުމުރުން 41 އަހަރުގެ އަންހެން ފަތުރުވެެރިއެކެވެ. "އޯސީއޭ އެމް7 އެސް" ނަމަކަށް ކިޔާ ސަފާރީއެއްގައި ފީނަން ފޭބި މި ފަތުރުވެރިޔާ އަދި ފެނިފައެއް ނުވެއެވެ.
