އެމެރިކާގެ މަޝްހޫރު ކޮމީޑިއަން އަދި އެކްޓާ ކެވިން ހާޓް ދަތުރުކުރަމުން ދިޔަ ކާރު އެކްސިޑެންޓްވެ، އޭނާއަށް ސީރިއަސް އަނިޔާތަކެއް ލިބިއްޖެއެވެ.
ކެލިފޯނިއާގެ މެލިބޫ ހިލްސްގައި އިތުރު ދެ މީހަކާއެކު ކެވިން ހާޓް ދަތުރުކުރަމުން ދިޔަ ކާރު މަގުން ކަހާލައިގެން ކޮންޓްރޯލް ނުކުރެވި ގޮސް، މަގުގެ މަގަތަށް ޖަހާފައިވާ ފެންސް ފަޅާލާ، 10 ވަރަކަށް ފޫޓު އަޑިއަށް ވެއްޓިފައިވާ ކަމަށް ޚަބަރު ލިބެއެވެ.
ހާދިސާ ހިނގި ވަގުތު ކާރުގައި ތިބީ ކެވިން ހާޓްއާއި އަންހެނެއްގެ އިތުރުން ކާރުގެ ޑްރައިވަރު ސީޓުގައި އިން ޖެރާޑް ބްލެކްއެވެ. އޭނާ އިނީ މަސްތުގެ ހާލުގައި ނޫންކަމަށް، ކަމާ ބެހޭ ފަރާތްތަކުން ވަނީ ބުނެފައެވެ. ކެވިންއާއި ޑްރައިވަރުގެ ބުރަކަށްޓަށް ސީރިއަސް އަނިޔާތަކެއް ލިބިފައިވާކަމަށް މައުލޫމާތު ލިބެއެވެ. ކާރުގައި އިން އަންހެން މީހާއަށް ސިއްހީ ފަރުވާ ބޭނުންވާ ވަރުގެ އަނިޔާއެއް ލިބިފައި ނުވާކަމަށް ޚަބަރު ލިބެއެވެ.
އެކްސިޑެންޓްގައި ކާރަށްވެސް ބޮޑެތި ގެއްލުންތަކެއް ލިބިފައިވާއިރު ކާރު ތެރޭގައި ތިބި މީހުން އެ ކާރުން ނެރެންޖެހުނީ ކާރުގެ މަތީބައި ކީހާލައިގެންނެވެ. އެކްސިޑެންޓްވި ކާރަކީ ކެވިން ހާޓްގެ 40 ވަނަ އުފަންދުވަހުގެ ހަދިޔާއެއްގެ ގޮތުގައި މިދިޔަ ޖުލައި މަހު އޭނާ އަމިއްލައަށް ގަތް ކާރެކެވެ.
