ކުރީގެ ނައިބު ރައީސް އަހުމަދު އަދީބު އިމިގްރޭޝަނުން، މިނިވަން ނޫހުގެ ނޫސްވެރިޔާ އަހުމަދު ރިޟްވާންގެ ޕާސްޕޯޓް ކޮޕީއެއް ހޯއްދެވުމަށް މަސައްކަތް ކުރައްވާފައިވާ ކަން ހާމަވެއްޖެއެވެ.
ރިޟްވާން މައްސަލަ ތަހުގީގު ކުރާ މަރު ކޮމިޝަނުގެ ރައީސް ހުސްނުއްސުއޫދު ވިދާޅުވީ، ރިޟްވާންގެ ޕާސްޕޯޓް ކޮޕީ އެއް ހޯދުމަށް އަދީބު މަސައްކަތް ކުރައްވާފައި ވަނީ އެމްއެންޑީއެފްގެ އިސް ފަރާތަކާ މަޝްވަރާ ކޮށްގެން ކަމަށެވެ. އަދި އެއީ، ރިޟްވާން ރާއްޖެއިން ބޭރަށް ސީރިއާއަށް ފުރައިގެން ގޮސް މަރުވެފައިވާ ކަން ދެއްކުމަށާ، ރިޟްވާން އާ ބެހޭގޮތުން ދެކެވެމުން ދިޔަ ވާހަކަތައް ހުއްޓުމަށްޓަކައި ކަމަށް ސުއޫދު ވިދާޅުވިއެވެ.
އަދީބުގެ އިތުރުން ފުލުހުންގެ ދެ އިންޓެލް އޮފިސަރުން ވެސް ވަނީ ރިޟްވާން ރާއްޖެއިން ބޭރަށް ފުރައިގެން ދިޔަ ކަމަށް ދެއްކުމަށް އޭނާގެ ޕާސްޕޯޓް ކޮޕީއެއް ހޯދުމަށް އިމިގްރޭޝަން ކޮންޓްރޯލާގެ އޮފީހަށް ގޮސްފައެވެ. އަދި އެކަން މަރު ކޮމިޝަނަށް ލިބިފައިވާ ހެކިންނާއި ބަޔާންތަކުން އެނގޭ ކަމަށް ސުއޫދު ވިދާޅުވިއެވެ.
ރިޟްވާން ގެއްލިފައި ވަނީ 2014 ވަނަ އަހަރުގެ އޮގަސްޓް މަސް ތެރޭގައެވެ. އޭނާ ގެއްލުވާލާފައި ވާތާ 5 އަހަރު ވެފައި ވާއިރު، އޭނާ މަރާލައިފައި ވާ ކަން ހާމަވީ އަދި ކިރިޔާއެވެ.
