ހދ. ނޮޅިވަރަންފަރުން ފުރައިގެން ހަނިމަދޫ އަށް ދަތުރު ކުރަނިކޮށް ލޯންޗެއް ބަންޑުން ޖަހާލި ހާދިސާގައި ގައުމީ ފުޓްބޯޅަ ޓީމުގެ މިޑްފީލްޑަރު އިބްރާހިމް ވަހީދު ހަސަން (އިއްބެ)ގެ އާއިލާ މެންބަރުން ހިމެނޭތީ، އޭނާ ރާއްޖެ އަންނަން ދަތުރު ފަށައިފިއެވެ.
ބޮޑުބޭބެގެ އާއިލާ މެންބަރުންގެ ޖަނާޒާގައި ބައިވެރިވުމަށް އިއްބެ ދަތުރު ފަށާފައި ވަނީ، ވޯލްޑް ކަޕް ކޮލިފައިންގައި އަންނަ މަހުގެ ފަސް ވަނަ ދުވަހު ގުއާމާ ދެކޮޅަށް އެ ގައުމުގައި ކުޅޭ މެޗަށް ދިއުމަށް ވިސާ ނެގުމަށްޓަކައި ގައުމީޓީމާ އެކު ސްލީ ލަންކާގައި ހުރެފައެވެ. އިއްބެގެ އާއިލާ މީހުންގެ މަރާއި ގުޅިގެން އެ ހިތާމާގައި ބައިވެރިވުމަށް ގައުމީ ޓީމުގެ ތަމްރީން ޕްރޮގްރާމްތައް މިވަގުތަށް ވަނީ މެދުކަނޑާލާފައެވެ.
ލަންކާގައި ގައުމީ ޓީމުގެ ފަރިތަކުރުންތައް ކުރިއަށް ގެންދަނީ، ގުއާމް އަށް ދިއުމަށް ޔޫއެސް ވިސާ ނަގަން ދިގު މުއްދަތެއް ނަގާތީއެވެ. މިވަގުތު ރާއްޖޭގައި ހުރި އެންމެ ހުނަރުވެރި އެއް މިޑްފީލްޑަރު ކަމަށްވާ އިއްބެ އަކީ ޑިސިޕްލިން ރަނގަޅު، މޮޅު ކުޅުންތެރިޔެކެވެ.
އިއްބެގެ އާއިލާގެ ބައެއް މީހުން މަރުވެފައި ވަނީ މިއަދު ނޮޅިވަރަމްފަރުން ހަނިމާދޫ އަށް ދަތުރު ކުރަމުން ދަނިކޮށް، ހަނިމާދޫ ކަނޑިންމައިން އެތެރެއަށް ވަންނަން އުޅުމުގެ ތެރޭގައި ނެގި ރާޅަކާ އެކު ލޯންޗު ފުރޮޅާލައި އޭގައި ތިބި މީހުން ކަނޑުވުމުންނެވެ. އޭނާގެ އާއިލާ މެންބަރުންގެ އިތުރުން އިތުރު ހަ މީހުންނާއި އެކު މި ލޯންޗު ދަތުރު ކޮށްފައި ވާއިރު، ލޯންޗުން ދަތުރު ކުރި 10 މީހުންގެ ތެރެއިން ޖުމްލަ ފަސް މީހުން ވަނީ މަރުވެފައެވެ. އެގޮތުން، މި ހާދިސާގައި އިއްބެގެ އާއިލާގެ ހަތަރު މެންބަރުން މަރުވެފައި ވާއިރު، ދެން މަރުވެފައިވަނީ ނޮޅިވަރަމްފަރު ސްކޫލުގައި ކިޔަވައިދޭ ޓީޗަރެއްގެ އަންހެނުންނެވެ.
