ދުނިޔޭގެ އެކި ކަންކޮޅުތަކުން އެތައް މިލިއަން ކުޑަކުދިންނެއްގެ ހިތްތަކުން ޖާގަ ހޯދާފައިވާ މަޝްހޫރު ލަވަ "ބޭބީ ޝާކް"ގެ ޕްރޮޑިއުސަރު ކަމަށްވާ "ޕިންގްފޮންގް"ގެ ބެލެނިވެރި ކުންފުންޏާ ދެކޮޅަށް ކޮޕީރައިޓްސް ދައުވާއެއް ހުށަހަޅައިފިއެވެ.
ޕިންގްފޮންގްގެ ބެލެނިވެރި ކުންފުންޏާ ދެކޮޅަށް ދެކުނު ކޮރެޔާގެ ކޯޓަކަށް، ކޮޕީރައިޓްސް ދައުވާއެއް ހުށަހަޅާފައިވަނީ، ޖޯނީ އޮންލީ ނަމަކަށް ކިއާ މިއުޒީޝަނެކެވެ. އޭނާ ވަކާލާތު ކުރާ ގޮތުގައި، ބޭބީ ޝާކްއަކީ އޭނާގެ ލަވައެކެވެ.
ކަންމިހެން އޮތް ނަމަވެސް، އަދާ ޖެހެންދެކަށްވެސް "ބޭބީ ޝާކް" ލަވައިގެ ފެށުން އައި ގޮތެއް އެއްވެސް މީހަކަށް ސާބިތުކޮށްދެވިފައެއް ނުވެއެވެ.
އޮންލީ ބުނާ ގޮތުގައި، އޭނާ މި ލަވަ ކިއާތާ 20 އަހަރު ދުވަސް ވެދާނެއެވެ. މިއީ މީގެ އެތައް އަހަރެއް ކުރިން އެމެރިކާގެ ސަމާ ކޭމްޕުތަކުގައި ކީ ލަވައެއް ކަމަށް ބުނާއިރު، އޮންލީވެސް ވަނީ މިފަދަ ވާހަކައެއް ބުނެފައެވެ. އޮންލީ ބުނާ ގޮތުގައި އޭނާ ވަނީ، މި ލަވައަށް ކޮންމެވެސް ވަރެއްގެ ބަދަލުތަކެއް ގެނެސް، ކުޑަކުދިން ޝައުގުވެރިވާފަދަ ގޮތަކަށް އިސްލާހުކޮށްފައެވެ. އަދި ޕިންގްފޮންގްއިން ނަކަލު ކޮށްގެން އުޅެނީ، އޭނާ އިސްލާހު ކުރި ގޮތަށް ކަމަށް އޮންލީ ދައުވާ ކުރެއެވެ.
އޮންލީ ވަނީ އޭނާގެ "ބޭބީ ޝާކް" ވާޝަން 2011 ވަނަ އަހަރު ޔޫޓިއުބްގައި އާންމުކޮށްފައެވެ. މިހާތަނަށް މި ވީޑިއޯއަށް ލިބިފައިވަނީ ގާތްގަނޑަކަށް 100000 ވިއުޒްއެވެ. ޕިންގްފޮންގްގެ ވާޝަންއަށް ލިބިފައިވާ ވިއުޒްގެ އަދަދު އުޅެނީ 3.5 ބިލިއަންގައެވެ.
ޕިންގްފޮންގްއިން ދަނީ އޮންލީގެ ދައުވާއަށް އިންކާރު ކުރަމުންނެވެ.
