އިސްލާމްދީނުގެ އަސްލުތަކާ ހިލާފަށް ރައްޔިތުންގެ މަޖިލީހުން ފާސްކުރާ އެއްވެސް ގާނޫނަކަށް ވޯޓު ނުދެއްވާނެ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެއެވެ.

ޖޭޕީއަށް ކުރީގެ ނާއިބު ރައީސް އަބްދުﷲ ޖިހާދުގެ އިތުރުން ޕީޕީއެމްގެ ކުރީގެ މަޖިލިސް މެންބަރުންތަކެއް މިރޭ ސޮއި ކުރުމަށް ބޭއްވި ޖަލްސާގައި ވާހަކަ ދައްކަވަމުން ޖޭޕީގެ ލީޑަރު ގާސިމް އިބްރާހީމް ވިދާޅުވީ އެމަނިކުފާނު ކުރައްވާ ކަމެއް ކުރައްވާނީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ދަންނަވާފައި ކަމަށެވެ. އަދި ވިދާޅުވީ ދިވެހިރާއްޖޭގެ ގާނޫނު އަސާސީއާ އިސްލާމްދީނުގެ އެއްވެސް އަސްލަކާ ހިލާފު ނުވާހާ ހިނދަކު މިއަދުގެ ސަރުކާރާ ވަކިވެގެން ވަޑައި ނުގަންނަވާނެ ކަމަށެވެ.

"އަޅުގަނޑުމެން ކޯލިޝަނުން ބޭރުކޮށްލަންދެން، އަޅުގަނޑުމެން ކޯލިޝަނުން ވަކި ކޮށްލަންދެން އަޅުގަނޑުމެން އޮންނާނީ މި ސަރުކާރުގެ ކޯލިޝަން ތެރޭގައި،" މާމިގިލި ދާއިރާގެ މެންބަރުކަންވެސް ކުރައްވަމުން ގެންދަވާ ގާސިމް ވިދާޅުވިއެވެ.

ގާސިމް ވިދާޅުވީ ސަރުކާރު ކޯލިޝަނުގައި އޮތުމަކީ ޕާޓީ ހަރުދަނާ ކުރަން ކުރަންޖެހޭ މަސައްކަތް ކުރުން ހުއްޓާލަން ޖެހޭ ކަމެއް ނޫން ކަމަށެވެ. އޭނާ ވިދާޅުވީ އަބަދަކު ޖޭޕީއެއްވެސް އެއް ލެވަލްއެއްގައި ނޯންނާނެ ކަމަށެވެ. ގާސިމް ވިދާޅުވީ ޖުމްހޫރީ ޕާޓީ ކުރިއަށް އޮތްތަނުގައި ގިނަ މަސައްކަތްތަކެއް ކުރާނެ ކަމަށެވެ. އެގޮތުން ކުރިއަށް އޮތް ކައުންސިލް އިންތިހާބު ކާމިޔާބު ކުރުމަށްޓަކައިވެސް ޖޭޕީން ބުރަ މަސައްކަތްތަކެއް ކުރާނެ ކަމަށް ގާސިމް ވިދާޅުވިއެވެ.

"ކޯލިޝަން އަކުން އަޅުގަނޑުމެން ޖޭޕީ ވަތްކެއް ނުވާނެ. ސަރުކާރު ދަމަހައްޓަން މަސައްކަތްވެސް ކުރާނަން. އެކަމަކު އޭގެ މާނައެއް ނޫން ދެއްތޯ އެއީކީއެއް ޖޭޕީ އޮންނަ ލެވަލްގައި އޮތުން. ޖޭޕީންވެސް ބޮޑުވާން މަސައްކަތް ކުރާނެ. އަބަދަކު އެއް މަގާމަކު ނޯންނާނެ. އަންނަ ކައުންސިލް އިންތިހާބަށް ތައްޔާރުވާން އެބަޖެހޭ. ރޭހުގެ ފަހަތުގައި އޮންނާކަށް އަބަދަކު ބޭނުމެއް ނުވާނެ،" ރައްޔިތުން މަޖިލީހުގެ ރައީސްކަން ވެސް ކުރެއްވި ގާސިމް ވިދާޅުވިއެވެ.

ސަރުކާރުން ކަމެއް ނުވާ ކަމަށް ބުނާ ފަރާތްތަކަށް ގާސިމް ވިދާޅުވީ ވޭތުވެގެން ދިޔަ ތިން ވެރިކަމުގައިވެސް ފުރަތަމަ އަހަރު ދުވަސް ތެރޭގައި ކަންކަން ފަށައިގަނެގެން ދިޔަ މަންޒަރެއް ފެނިފައި ނުވާނެ ކަމަށެވެ. އެންމެ ގަދައަށް ތަރައްގީގެ މަސައްކަތް ކުރެއްވި ކުރީގެ ރައީސް އަބްދުﷲ ޔާމީންގެ ސަރުކާރުގައިވެސް ތަރައްގީގެ މަސައްކަތްތައް ރައްޔިތުންނާ ހަމައަށް ފެންނަން ފެށީ، ދެ އަހަރެއްހާ ދުވަސް ފަހުން ކަމަށް އޭނާ ވިދާޅުވިއެވެ.

"ރައްޔިތުން މާޔޫސްވާ ވަރަކަށް އަދި ނުދޭ. އެތައް ބިލިއަން ރުފިޔާގެ ބިލު ނުދެއްކި އެބަހުރި. އެކަންކަން ވެސް ސަރުކާރުން ދަނީ ކުރަމުން. އަބަދުވެސް ޓްރެޒަރީ ބޮންޑު ވިއްކައިގެން މުސާރަ ދޭން މިޖެހެނީ. އެހީ ހޯދަން ޖެހެނީ ކިހިނެއްކަން އަޅުގަނޑާއި މި އިންނެވި ޖިހާދަށް އެނގިލައްވާނެ. އެހީއެއް ލިބޭ ވަރު ވަނީ މިނިސްޓަރުން ބޯގޮވާ ވަރުވާ ފަހުން،" ގާސިމް ވިދާޅުވިއެވެ.

ގާސިމް ވަނީ މިރޭ އެޕާޓީއާ ގުޅިވަޑައިގެން މެންބަރުންނަށް މަރުހަބާ ދަންނަވާފައެވެ. އަދި އޭނާ ވިދާޅުވީ މިރޭ އެޕާޓީއާ ގުޅިވަޑައިގެން މެންބަރުންތަކަކީ އެއް ޕާޓީއެއްގައި އެއް ފިކުރެއްގައި އެހާ ގިނަ ދުވަސްތަކެއް ވަންދެން މަސައްކަތް ކުރެއްވި އިހްލާސްތެރި ބޭފުޅުންތަކެއް ކަމަށެވެ.

ގާސިމް އިބްރާހިމް ސިޔާސީ ޖޭޕީ