އއ. އުކުޅަހުގައި ގާއިމް ކުރާ ކޮންފަރެންސް ހޯލް ކަމަށްވާ، 'އުކުޅަސް ކޮންވެންޝަން ސެންޓަރު' ނިންމާ، އެރަށު ކައުންސިލާ ހަވާލުކޮށްފިއެވެ.
އިންޑިއާ ސަރުކާރުގެ 7.8 މިލިއަން ރުފިޔާގެ އެހީއާ އެކު ޖުމްލަ 20.8 މިލިއަން ރުފިޔާގެ މި މަޝްރޫއަކީ މިދިޔަ ޖުލައި މަހު 25 ވަނަ ދުވަހު އެއްބަސްވުމުގައި ސޮއިކޮށް، 27 ވަނަ ދުވަހު އަމަލީ މަސައްކަތް ފެށި މަޝްރޫއެކެވެ. މި މަޝްރޫއުގެ އަމަލީ މަސައްކަތް ފެށިތާ 29 ދުވަސް ތެރޭ މިނިސްޓްރީ އޮފް ޕްލޭނިން އެންޑް އިންފްރާންސްޓްރަކްޗާ އިން ވަނީ މި ކޮންވެންޝަން ސެންޓަރު އުކުޅަސް ކައުންސިލާ ރަސްމީކޮށް ހަވާލުކޮށްފައެވެ.
ޕްލޭނިން މިނިސްޓްރީީން މި ސެންޓަރު އުކުޅަސް ކައުންސިލާ ހަވާލު ކުރީ މިއަދު އުކުޅަސް ކައުންސިލް އިދާރާގައި ބޭއްވި ހާއްސަ ރަސްމިއްޔާތެއްގައެވެ. މި ރަސްމިއްޔާތުގައި ޕްލޭނިން މިނިސްޓްރީގެ ފަރާތުން މިިނިސްޓަރު މުހައްމަދު އަސްލަމް ކަމާބެހޭ ރަސްމީ ލިޔެކިއުންތަކުގައި ސޮއި ކުރެއްވިއިރު، އުކުޅަސް ކައުންސިލްގެ ފަރާތުން މި ލިޔެކިއުންތަކުގައި ސޮއިކުރެއްވީ ކައުންސިލް ރައީސް ޝައުކަތު އިބްރާހިމެވެ.
އަމީން ކޮންސްޓްރަކްޝަނާ ހަވާލުކޮށްގެން ބިނާކުރި 11300 އަކަފޫޓުގެ މި މިކޮންވެންޝަން ސެންޓަރުގައި މަލްޓި ޕަރޕަސް ހޯލަކާއި، ބައްދަލުކުރާ ކޮޓަރިތަކާއި، 2 ކުލާސް ރޫމާއި، ސައުންޑް/ލައިޓްސް ކޮންޓްރޯލް ރޫމާއި، ރިސެޕްޝަނާއި، އިދާރީ އޮފީހާއި، 8 ފާހާނާ އަދި ވެއިޓިން އޭރިޔާ ހިމެނެއެވެ.
އުކުޅަސް ކައުންސިލް އިދާރާގައި ބޭއްވި ރަސްމިއްޔާތުގައި ވާހަކަ ދައްކަވަމުން، މިނިސްޓަރު އަސްލަމް ވިދާޅުވީ މި މަޝްރޫއުއަކީ މިހާތަނަށް އެންމެ ބާރު ސްޕީޑުގައި ނިމިގެންދިޔަ މަޝްރޫއެއް ކަމަށެވެ. 400 މީހުންގެ ޖާގައިގެ މި ކޮންވެންޝަން ސެންޓަރަކީ އުކުޅަހުގެ މުސްތަގުބަލުގައި ވަރަށް ގިނަ މުހިންމު ބޭނުންތަކެއް ކުރެވިގެންދާނެ ތަނެއްކަމަށް މިނިސްޓަރު ވިދާޅުވިއެވެ. އަދި ބާރު ސްޕީޑުގައި، އެއްވެސް ދަތިކަމެއްނެތި މިހާ ފުރިހަމަކޮށް މިއަދު މަޝްރޫއުތައް ނިމިގެން ދިއުމަކީ ލޯކަލް ކޮންޓްރެކްޓަރުންގެ ގާބިލްކަން އެނގިގެންދާ ކަމަށް މިނިސްޓަރު ވިދާޅުވިއެވެ. މިނިސްޓަރު އަސްލަމް ވިދާޅުވީ ސަރުކާރުގެ ތަރައްގީގެ މަޝްރޫއުތައް ކުރިއަށް ގެންދިއުމުގެ ސްޕީޑް ވަރަށް ހަލުވިކަން މި މަޝްރޫއު އިން ފާހަގަވާ ކަމަށެވެ.
