ބާރު ސްޕީޑުގައި ދުއްވާފައި ދިޔަ ޕިކަޕެއް ކޮންޓްރޯލް ނުވެ ގޮސް އެކްސިޑެންޓް ވެއްޖެއެވެ.
މި ހާދިސާއާ ގުޅިގެން ފުލުހުން ބުނީ، ބާރު ސްޕީޑްގައި ދުއްވާފައި ދިޔަ ޕިކަޕެއް ކޮންޓްރޯލް ނުވެ އެކްސިޑެންޓްވީ މާލެ އިން ހުޅުމާލެއަށް ދަނިކޮށް، މަގުގެ އަރިމަތީގައި ހުރި ފެންސްގައި ޖެހި ކަމަށެވެ. ފުލުހުން ބުނީ މި ހާދިސާގެ ރިޕޯޓް ފުލުހުންނަށް ލިބިފައި ވަނީ މިއަދު 11:30 ގައި ކަމަށެވެ.
މި ހާދިސާގައި އެއްވެސް މީހަކަށް އަނިޔާވެފައި ނުވާއިރު ޕިކަޕަށާއި މަގުގެ އަރިމަތީގައި ހުރި ފެންސްތަކަށް ގެއްލުން ވެފައިވާ ކަމަށް ފުލުހުން ބުނެއެވެ. ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
މީގެ ކުރިން ހިނގާފައިވާ މިފަދަ ހާދިސާތަކަށް ބަލާއިރު މިދިޔަ ޖޫމް މަހު ވެސް ވަނީ މާލޭއިން ހުޅުމާލެއަށް ދިޔަ ކާރެއް ޓަޔަރު ފަޅާއިގެން ގޮސް ހައިވޭގެ ފެންސަށް އަރާފައެވެ. މި އެކްސިޑެންޓްގައި ކާރުގެ ބޮނެޓާއި ބަފަރު ވަރަށް ބޮޑަށް ހަލާކުވެފައި ވީ ނަމަވެސް މި އެކްސިޑެންޓުގައި އެއްވެސް މީހަކަށް އަނިޔާ ނުވެއެވެ.
މީގެ އިތުރުން ފާއިތުވެދިޔަ ހަފްތާގެ ތެރޭގައި ވެސް މާލޭގައި ވަނީ 31 އެކްސިޑެންޓް ހިނގާ އަށް މީހަކަށް އަނިޔާވެފައެވެ. އަދި ފުލުހުން ވަނީ މި އެކްސިޑެންޓްތަކުގައި އެކެއްގެ ލައިސަންސް ހިފަހައްޓާފައެވެ.
