މުދާ ބަރުކޮށްގެން ކ. މާހަލް ކައިރިން ދަތުރުކުރި ދޯންޏެއް އަރި އަޅާލާ އޭގައި ހުރި މުދާތައް ކަނޑަށް ދޫވެއްޖެއެވެ.
މި ހާދިސާއާ ގުޅިގެން މޯލްޑިވްސް ނޭޝަނަލް ޑިފެންސް ފޯސް އިން ބުނީ، މި ހާދިސާގެ ރިޕޯޓް 10:30 ހާއިރު ލިބުމާއި އެކު އެމްއެންޑީއެފް މާލެ އޭރިއާ އިން ހަރަކާތްތެރި ވަމުންދާ ކަމަށެވެ. އެގޮތުން ޑައިވަރުންނާއި އެކު ކޯސްޓް ގާޑް ލޯންޗް މިހާރު ދަނީ ލޯންޗު އޮތް ސަރަހައްދަށް ދަތުރުކުރަމުންނެވެ.
އެމްއެންޑީއެފުން ބުނީ މި ދޯނީގައި ދަތުރުކުރީ ހަތަރު މީހުން ކަމަށާއި އޭގެ ތެރޭގައި ތިން ބިދޭސީންނާއި ދިވެއްސަކު ތިބި ކަމަށެވެ.
ކ. މާހަލް ކައިރިން ދަތުރުކުރި "ސަމޯރާ 2" ނަމަކަށް ކިޔާ މި ދޯނި ދަތުރު ކުރަމުން ދިޔައީ މާލެ އިން ފުރައިގެން ކ. ކަގި އަށް ކަމަށް އެމްއެންޑީއެފުން ބުނެއެވެ.
މީގެ އިތުރުން 'ސަމޯރާ 2' އަރި އަޅާލުމުގެ ސަބަބުން ކަނޑަށް ދޫވި މުދާތައް އޮޔާ ދާތީ، އެ ސަރަހައްދުން ދަތުރު ކުރާ ފަރާތްތައް އެކަމަށް ސަމާލު ވުމަށް އެމްއެންޑީއެފުން ވަނީ އިލްތިމާސްކޮށްފައެވެ.
