ދިވެހިންގެ ތެރޭގައިވެސް އެއް އިރެއްގައި މަޝްހޫރުވި 1990ގެ ޓީވީ ސީރީޒް "ބެވަލީ ހިލްސް 90210"ގެ ކާސްޓުންނާއެކު އެ ސީރީޒްގެ ރީބޫޓް ޝޯއެއް ދައްކަން ފަށައިފިއެވެ.
މިފަހަރުގެ ޝޯގައިވެސް ފެނިގެންދާނީ 90 ގެ އަހަރުތަކުގައި ގެނެސްދިން ސީރީޒްއިން ފެނުނު ލީޑު 7 ތަރިންނެވެ. 1 ގަޑިއިރުގެ 6 އެޕިސޯޑްގެ މައްޗަށް އެކުލެވޭ ރީބޫޓް ޝޯގައި ފެނިގެންދާނީ މި ތަރިންގެ ހަގީގީ ދިރިއުޅުމުގެ އަސްލަށްވުރެވެސް "ޑްރާމާ"ކޮށް ކަމަށް މައުލޫމާތު ލިބެއެވެ. އެތަނުން ހަގީގަތަކީ ކޮބައިކަން އަދި "ޑްރާމާ"އަކީ ކޮބައިކަން ދެނެގަތުމަށް ދޫކޮށްލާނީ ބެލުންތެރިންނަށް ކަމަށްވެސް ސީރީޒްގެ ކާސްޓުން ވަނީ ބުނެފައެވެ.
90ގެ ސީރީޒްގެ ރަހަގަނޑު ލައްވާލުމަށް، ރީބޫޓް ސީރީޒްގައި މާޒީގެ ސޮފުހާތަކެއްވެސް އުކާލެވިގެންދާނެ ކަމަށް ބެލެވެއެވެ.
"ބެވަލީ ހިލްސް 90210"ގެ ރީބޫޓަށް މިހާތަނަށް ލިބިފައިވަނީ ވަރަށް އެދެވޭ ރިވިއުތަކެކެވެ.
1990 ވަނަ އަހަރުން 2000 ވަނަ އަހަރުގެ ނިޔަލަށް ދެއްކި "ބެވަލީ ހިލްސް 90210"ގެ ވާހަކަ ބިނާކޮށްފައިވަނީ ފުރާވަރުއުމުރުގެ 'ފޮނިކަން" ދެކެމުންދިޔާ ކުދިންތަކެއްގެ ދިރިއުޅުމުގެ މައްޗަށެވެ. މީގެ އިތުރުން ލޯބިވެރިޔާގެ ފަރާތުން ކުރިމަތިލާންޖެހޭ ރޭޕްގެ އަނިޔާއާއި، އެއިޑްސްގެ އިތުރުން ފުރާވަރު އުމުރުގައި ބަލިވެއިންނަންޖެހުން ފަދަ ސީރިއަސް މައްސަލަތަކެއްވެސް މި ޑްރާމާ ސީރީޒްގައި ވަނީ ފެންމަތިކޮށްފައެވެ.
"ބެވަލީ ހިލްސް 90210"ގެ ރީބޫޓް ސީރީޒްގައި، މަޝްހޫރު ތަރި ލޫކް ޕެރީގެ ހަނދާންތައް އާ ކުރެވިގެންދާނެކަމަށް މައުލޫމާތު ލިބެއެވެ.
