ރިލީޒް ކުރިތާ އެންމެ 7 ދުވަހުގެ ތެރޭގައި "މަނީ ހައިސްޓް 3"އިން ނެޓްފްލިކްސްގެ ރެކޯޑް މުގުރާލައިފިއެވެ.
ތާރީހު ދުށް އެންމެ ވަރުގަދަ ވައްކަމުގެ ޖަރީމާ ހިންގުމަށް "ދަ ޕްރެފެސާ"އާއި އޭނާގެ ރެކްރޫޓުން ކުރަމުންދާ އާދަޔާ ހިލާފު މަސައްކަތްތައް ފެނިގެންދާ ކްރައިމް-ޑްރާމާ ސީރީޒް "މަނީ ހައިސްޓް" ގެ 3 ވަނަ ސީޒަން ރިލީޒްކުރިތާ ހަފުތާއެއްހާ ދުވަހުގެ ތެރޭގައި 34 މިލިއަން މީހުން އެ ސީރީޒްގެ އެޕިސޯޑްތައް ބަލާފައިވާކަމަށް ނެޓްފްލިކްސްއިން ބުނެއެވެ.
މިއީ ނެޓްފްލިކްސްގެ ތާރީހުގައިވެސް މިހާ ގިނަ ބަޔަކު އެއް ކޮންޓެންޓެއް ބެލި ފުރަތަމަ ފަހަރެވެ.
"ލަ ކާސަ ދި ޕަޕޭލް"ގެ ނަމުގައި އުފައްދާފައިވާ ސްޕެނިޝް ޑްރާމާ ސީރީޒް ގެ ނަން، "މަނީ ހައިސްޓް"އަށް ބަދަލުކޮށްގެން ނެޓްފްލިކްސްގައި ސްޓްރީމްކުރަން ފެށިފަހުން ލިބުނު ކާމިޔާބީއާއި ބެހޭ ގޮތުން ސީރީޒް ޑައިރެކްޓާ ޑިއެގޯ އަވާލޯސް ބުނީ، ސްޕެއިންގެ އުފެއްދުމެއް މުޅި ދުނިޔެއަށް ދައްކާލެވޭތީ ފަހްރުވެރިވާކަމަށެވެ.
ދުނިޔޭގެ ކޮންމެ ހިސާބަކަށް ބަލާލިކަމުގައި ވީ ނަމަވެސް "މަނީ ހައިސްޓް"ގެ މަބުލޫކަން އިތުރުވެފައިވަނީ، ވާހަކަ ގެނެސްދީފައިވާލެއް "އަސްލު" ކަމުންނާ، މަންޒަރުތަކަކީވެސް ވީހާވެސް "ހަގީގީވަންތަ" މަންޒަރުތަކަކަށްވުމުން ކަމަށް ޑައިރެކްޓާ ވަނީ ފާހަގަކޮށްފައެވެ.
"މަނީ ހައިސްޓް"ގައި ފެނިގެންދަނީ ސްޕެއިންގެ މަރުކަޒީ ބޭންކާ ދައުލަތުގެ ބޭންކު "ފަޅާލާ" ތާރީހު ނުދެކޭ ވަރުގެ ބޮޑެތި ވައްކަންތަކެއް ކުރަމުންދާތަނެވެ.
"ޕްރޮފެސާ"ގެ މިޝަން ކާމިޔާބު ކުރުމަށްޓަކައި ކުޅިބައި ތެރޭގައި ފުލުހުންގެ ސަފުތައް ރުކުރުވާލެވޭ ގޮތްވެސް މި ސީރީޒްއިން ފެނިގެންދެއެވެ.
"މަނީ ހައިސްޓް"ގެ 3 ވަނަ ސީޒަން ނިންމާލާފައިވަނީ ބޮޑެތި ސުވާލުތަކެއް އުފެދޭ ފަދަ ގޮތަކަށް ކަމަށްވާއިރު، 4 ވަނަ ސީޒަންގެ އިޝާރާތެއްވެސް މިހާރު ވަނީ ލިބިފައެވެ. "މަނީ ހައިސްޓް"އަކީ 2 ސީޒަންގެ މައްޗަށް އެޕިސޯޑްތައް ރާވައިގެން އުފައްދަން ފެށި ސީރީޒްއެއް ނަމަވެސް، 3 ވަނަ ސީޒަނެއް ގެނެސްދީފައިވަނީ ފޭނުންގެ ޑިމާންޑާ ހެދިއެވެ.
"މަނީ ހައިސްޓް" އަކީ މިއަދު ދިވެހިންގެ މެދުގައިވެސް ބޮޑު މަގުބޫލުކަމެއް ހޯދާފައިވާ ސީރީޒްއެކެވެ.
ބެލާ ޗާއޯ ބެލާ ޗާއޯ ބެލާ ޗާއޯ ޗާއޯ ޗާއޯ!