މަޝްހޫރު ލަވަކިއުންތެރިޔާ ބިޔޯންސޭއާއި ޖޭޒީގެ ފުރަތަމަ ދަރިފުޅު ބްލޫ އައިވީ ކާޓާ، އުމުރުން އެންމެ 7 އަހަރުގައި "ބިލްބޯޑް ހޮޓް 100" ޗާޓުން ޖާގަ ހޯދައިފިއެވެ.
ބިލްބޯޑްގެ ރިޕޯޓްތައް ބުނާ ގޮތުގައި "ބިލްބޯޑް ހޮޓް 100" ޗާޓުން ބްލޫ އައިވީ ޖާގަ ހޯދީ 76 ވަނަ ރޭންކުގައެވެ. އެއީ "ދަ ލަޔަން ކިންގް: ދަ ގިފްޓް" ގައި ހިމަނާފައިވާ "ބްރައުން ސްކިން ގާލް" ލަވާގައި އޭނާ ކޮށްފައިވާ މަސައްކަތުން ކަމަށްވެއެވެ. މައުލޫމާތު ލިބޭ ގޮތުގައި ބްލޫ އައިވީ ވަނީ މި ލަވަ ކޮމްޕޯޒްކޮށް، ލިޔުމުގައި އިސް ދައުރެއް އަދާކޮށްފައެވެ.
ބިޔޯންސޭއާއި ޖޭޒީއަކީވެސް "ބިލްބޯޑް ހޮޓް 100" ޗާޓާ ރައްޓެހި ފަންނުވެރިންތަކެކެވެ. އެގޮތުން މި ދެތަރިން އެކުގައްޔާ ވަކިން، އެތައް ފަހަރެއްގެ މަތިން ވަނީ "ބިލްބޯޑް ހޮޓް 100" ޗާޓުގެ އެކި ހިސާބުތަކުން ޖާގަ ހޯދާފައެވެ.
ބްލޫ އައިވީ އުފަންވިތާ ކުޑަ ދުވަސްކޮޅެއް ފަހުން އޭނާގެ އަޑުތައް ހިމަނައިގެން ޖޭޒީ އުފެއްދި ލަވައެއްވެސް ވަނީ "ބިލްބޯޑް ހޮޓް 100" ޗާޓުން ޖާގަ ހޯދާފައެވެ. އެހެންކަމުން މިއީ މި ޗާޓުން ބްލޫ އައިވީ ޖާގަ ހޯދި ފުރަތަމަ ފަހަރު ނޫނޭވެސް ދެންވިދާނެއެވެ.
