ވަކި ހިސާބަކުން ފިލްމީ ދާއިރާ ދޫކޮށް ރިޓާޔާކޮށްފާނެ ކަމަށް، 1990ގެ އަހަރުތަކުގެ ތެރޭގައި ފިލްމް "ޓައިޓޭނިކް"އިން ގިނަ ޒުވާނުންތަކެއްގެ ހިތް ކަތިލި ބަތޮލް، ލިއަނާޑޯ ޑިކެޕްރިއޯ ބުނެފިއެވެ.
އިރެއްގައި ހޮލީވުޑްގެ މަގުބޫލު ތަރިއެއްގެ ގޮތުގައި ވިދަމުން ގޮސް، އެ ތަރީގެ ވިދުން ފަނޑުވެގެންދާ ތަރިއެއްގެ ދިރިއުޅުން ދައްކުވާދޭ ފިލްމް "ވަންސް އަޕޯން އަ ޓައިމް އިން ހޮލީވުޑް"ގެ ލީޑުން ފެނިގެންދާ ލިއޯ ޑިކެޕްރިއޯ މިފަދަ މޭރުމަކުން ވާހަކަ ދައްކާފައި މިވަނީ، ފިލްމުގައި އޭނާގެ ކެރެކްޓާ ފެނިގެންދާ ގޮތާ، އޭނާގެ އަމިއްލަ ދިރިއުޅުން އަޅާ ކިޔަމުންނެވެ.
ފިލްމީ ސިނާއަތުގައި މިހާރު ޑިމާންޑް އޮތް ވަރަށްވެސް އޭނާއަށް ޑިމާންޑް ނެތް ދުވަހަކުން ކަން ކުރާނީ ކިހިނެއްތޯ ކުރެވުނު ސުވާލަކަށް ޖަވާބުދެމުން ލިއޯ ޑިކެޕްރިއޯ ބުނީ، ދެންވެސް ރަނގަޅު ޕްރޮޖެކްޓަކުން މަސައްކަތް ލިބޭނެ ކަމުގެ އުއްމީދުގައި ހުންނާނީ ކަމަށާ، ނަމަވެސް ވަކި ހިސާބަކުން ރިޓާޔާވެސް ކޮށްފާނެ ކަމަށެވެ. ނަމަވެސް ފިލްމީ ދާއިރާއަށް ނިކުމެވުމަކީ އޭނާއަށް ލިބުނު އެންމެ ބޮޑު ނަސީބު ކަމަށާ، އެ ނަސީބު އަތުން ބީވިޔަ ނުދީވޭތޯ ކުރެވެން ހުރި ހުރިހާ ަކމެއް ކުރާނެ ކަމަށްވެސް ލިއޯ ޑިކެޕްރިއޯ ވަނީ ބުނެފައެވެ.
ޖުލައި 26 ވަނަ ދުވަހު ރިލީޒް ކުރި ފިލްމު "ވަންސް އަޕޯން އަ ޓައިމް އިން ހޮލީވުޑް"، އިންޑިއާގައި ރިލީޒްކުރުމަށް ހަމަޖެހިފައިވަނީ އަންނަ އޯގަސްޓު މަހުގެ 15 ވަނަ ދުވަހުއެވެ.
ޝެނަން މެކިންޓޮޝްއާއި ޑޭވިޑް ހޭމަން ޕްރޮޑިއުސްކޮށްފައިވާ ފިލްމް "ވަންސް އަޕޯން އަ ޓައިމް އިން ހޮލީވުޑް" އަކީ، ދާދި ދަހުން ކުށްލި ގޮތަކަށް މި ދުނިޔެއާއި ވަކިވެގެންދިޔަ ލޫކް ޕެރީގެ މަންޒަރުތަކެއްވެސް އެ ފިލްމުގައި ހިމަނައިގެން އުފައްދާފައިވާ ފިލްމެކެވެ.
