އެމެރިކާއާއި ހުޅަނގުގެ ގައުމުތަކުގައި ބޮޑުވެފައިވާ ބަޑި ގެންގުޅުމުގެ މައްސަލައިގެ މައްޗަށް ބިނާކޮށް، ތަޖުރިބާކާރު މިއުޒީޝަން މެޑޯނާ، އާދަޔާ ހިލާފު ވީޑިއޯ ލަވައެއް އާންމުކޮށްފިއެވެ.
"ގޯޑް ކޮންޓްރޯލް"ގެ ނަން ދީފައިވާ މި ލަވާގައި ފެނިގެންދަނީ މީހުން ފިތިބާރުވެފައިވާ ބާއެއް ކަހަލަ ތަނަކަށް، ބަޑިހިފައިގެން ހުންނަ މީހަކު ވަދެ ހަމަލާ ދޭން ފަށާ މަންޒަރެވެ. އެއަށްފަހު ދެން ފެނިގެންދަނީ އެތަނުގެ ތެރޭގައި ތިބި މީހުންތައް މަރުވެގެން ބިންމައްޗަށް ވެއްޓޭ މަންޒަރާ، ލޭގެ ކޯރުތައް ދެމެމުންދާ މަންޒަރެވެ.
މިއީ "ހޭލަންވީ ވަގުތު" ކަމަށް މި ލަވާގައި މެޑޯނާ ބުނެއެވެ.
އުމުރުން 60 އަހަރުގެ މެޑޯނާ ބުނީ، މިއީ މީހުންނަށް ސިހުން ގެނުވުމުގެ މަގުސަދުގައި ހަދާފައިވާ ލަވައެއް ކަމަށެވެ. މި ލަވައިން ފެންނަ ބައެއް މަންޒަރުތަކަކީ، ބަޑީގެ ހަމަލާތަކާ ގުޅުންހުރި އަސްލަ މަންޒަރުތަކެއްކަންވެސް ފާހަގަކުރަން ޖެހެއެވެ.
މި ވީޑީއޯ އާންމުކުރިތާ 2 ގަޑިއިރުގެ ތެރޭގައި ގާތްގަނޑަކަށް 4 ލައްކައެއްހާ ވިއުޒްވަނީ ލިބިފައެވެ.
