މަޖިލީހުގެ ގަވާއިދަށް އިސްލާހު ގެނެސް، މެންބަރުން އިސްލާހު ކުރި ވަގުތު ދިނުމުގެ އުސޫލަށް އަމަލުކުރަން ފަށައިފިއެވެ.
މިއަދުގެ މަޖިލިސް ޖަލްސާ ފެށުމުގެ ކުރިން މަޖިލީހުގެ ރައީސް، ރައީސް މުހައްމަދު ނަޝީދު ވަނީ ވަގުތު ދިނުމުގެ އުސޫލަށް ގެނެވުނު ބަދަލަށް މިއަދުން ފެށިގެން އަމަލުކުރަން ފަށާނެކަން އިއުލާން ކުރައްވާފައެވެ. އަދި ދެން ކުރިއަށް ގެންދާ މަސައްކަތުގައި ވަގުތު ބައްސަވާނީ އާ އުސޫލުގެ ދަށުން ކަމަށް މަޖިލިސް ރައީސް ވަނީ ވިދާޅުވެފައެވެ.
ނަޝީދު ވިދާޅުވީ މެންބަރުންނަށް ވަގުތު އެރުވަމުން ގެންދަވަނީ ރާއްޖޭގެ ރައްޔިތުން މަޖިލީހަށް މެންބަރުން އައްޔަން ކުރެވުނުގޮތުގެ މައްޗަށް ބިނާވެގެން ކަމަށެވެ. އަދި މީގެކުރިން ވަގުތު އަރުވަމުންދިޔަ ހަރުކަށި އުސޫލު، މަޖިލީހުގެ ގަވާއިދަށް އިސްލާހު ގެނެވުނު އިރުގައި ވަނީ ބަދަލުވެފައި ކަމަށާއި، އެހެންކަމުން ވަގުތު އަރުވާ އެރުވުމުގައި ވާދަވެރި ފަރާތްތަކަށް ލިބިވަޑައިގަންނަވާ ވަގުތު ގިނަކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ މެންބަރުން މަދުވުމުން ވާދަވެރި ފަރާތްތަކަށް ގިނަވަގުތު ލިބިވަޑައިގަންނަވާ ކަމަށެވެ.
ހަމަހަމަ އުސޫލުގައި ކަނޑައެޅިގެންދާއިރުގައި އެމްޑީޕީގެ މެންބަރަކަށް ހަތަރު ގަޑި އިރުގެ ބަހުސެއްގައި ލިބިވަޑައިގަންނަވާނީ 2 މިނެޓް 21 ސިކުންތެވެ. އަދި ޕީޕީއެމްގެ ކޮންމެ މެންބަރަކަށާއި ޖޭޕީގެ ކޮންމެ މެންބަރަކަށް ހަތަރު މިނެޓް ލިބިވަޑައިގަންނަވާ އިރު، ޕީއެންސީގެ ކޮންމެ މެންބަރަކަށް ފަސް މިނެޓް އަދި އެމްޑީއޭގެ ކޮންމެ މެންބަރަކަށް ހަތް މިނެޓް ލިބިވަޑައިގަންނަވައެވެ.
މަޖިލީހުގެ ގަވާއިދު އިސްލާހު ކުރުމުގެ މަސައްކަތް ފަށާފައިވާ އިރު، ގަވާއިދު އިސްލާހު ކުރެވެމުންދާ ވަރަކަށް ގަވާއިދަށް އަމަލުކުރަމުންދާގޮތަށް މަޖިލީހުން ވަނީ ފާސްކޮށްފައެވެ.
