މާލޭ އިރުދެކުނު ފަރާތުގައިވާ ފަތާ ޓްރެކްގައި ސިޑިބަރިއާއިއެކު ފާހާނާ އާއި ފެންވަރާނެ ވަސީލަތްތައް ހިމެނޭގޮތަށް އިމާރާތެއް ހަދަން ސްވިމިންގް އެސޯސިއޭޝަން އޮފް މޯލްޑިވްސް އިން ނިންމައިފިއެވެ.
މިއަދު އެ އެސޯސިއޭޝަނުން ނެރުނު އިއުލާނުގައި ވަނީ މާލޭ އިރުދެކުނު ފަރާތުގައިވާ ފަތާ ޓްރެކްގައި ސިޑިބަރިއާއިއެކު ފާހާނާ އާއި ފެންވަރާނެ ވަސީލަތްތައް ހިމެނޭގޮތަށް އިމާރާތެއް ހަދަން ބޭނުންވާތީވެ، ޝަރުތުހަމަވާ ހުރިހާ ފަރާތްތަކަށް ބީލަން ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.
އޭގެއިތުރުން އެ އެސޯސިއޭޝަނުން ބުނީ އެ ޕްރޮޖެކްޓަށް ރަޖިސްޓްރީ ކުރުމާއި ޕްރޮޖެކްޓާއި ބެހޭގޮތުން ބާއްވާ މައުލޫމާތު ދިނުމުގެ ބައްދަލުވުން އަންނަ އަންގާރަ ދުވަހުގެ ހެނދުނު 11:00 ގައި އެ އެސޯސިއޭޗަންގައި އޮންނާނެ ކަމަށާއި އެ ބައްދަލުވުމުގައި ރަޖިސްޓްރީވާ ފަރާތްތަކަށް ބީލަން ފޮތް ހަވާލުކުރާނެ ކަމަށެވެ. އަދި ޕްރޮޖެކްޓަށް ރަޖިސްޓްރީ ނުކުރާ ފަރާތްތަކަށް ބީލަން ހުށަހެޅުމުގެ ފުރުސަތު ދިނުމަށް ހަމަޖެހިފައި ނުވާ ކަމަށްވެސް އެ ފަރާތުން ބުނެއެވެ.
އެގޮތުން މި ޕްރޮޖެކްޓްގެ ބިޑް ސެކިއުރިޓީގެ ގޮތުގައި 20،000 ރުފިޔާ ހުށަހަޅަން ޖެހޭނެ ކަމަށް އެ އެސޯސިއޭޗާނުން ބުނެއެވެ. އަދި ބީލަން ހުޅުވުން އޮންނާނީ މިމަހުގެ 23 ވާ ބުރާސްފަތި ދުވަހުގެ ހެނދުނު 11:00 ގައެވެ.
