އަޅާލާނެ މީހަކު ނެތިފައި ތިބި 147 ކުޑަކުދިންނަށް އެހީ ދެވިފައިވާ ކަމަށް މިނިސްޓާ އޮފް ޖެންޑާ ފެމިލީ އެންޑް ސޯޝަލް ސާވިސަސްއިން ބުނެފިއެވެ.
ޖެންޑާ މިނިސްޓްރީއިން ކުޑަކުދިންގެ ދުވަހާ ދިމާކޮށް ނެރުނު ތަފާސް ހިސާބުތަކުން ދައްކާ ގޮތުން 2018 ވަނަ އަހަރު އަޅާލާނެ މީހަކު ނެތިފައި ތިބި ކުދިން ބަލަމުންދާ 107 ފަރާތަކަށާއި އަޅާލާނެ މިހާކު ނެތިފައި ތިބި 147 ކުޑަކުދިންނަށް އިޖުތިމާއީ އެހީ ދެވިފައިވާ ކަމަށެވެ.
ކުޑަކުދިން ދުވަހުގެ މުނާސަބަތާއި ގުޅިގެން ޖެންޑާ މިނިސްޓާ ޝިދާތާ ޝަރީފް ދެއްވި ހިތާބުގައި ވިދާޅުވީ، ތަފާތު އެކި ސަބަބުތަކާ ގުޅިގެން ދައުލަތުގެ ބެލުމުގެ ދަށަށް ނެގޭ ކުދިންނަށް އާއިލާއެއްގެ ތެރޭގައި ބޮޑުވުމުގެ ފުރުސަތު ފަހިކުރުމުގެ ގޮތުން ފޮސްޓާކުރުމުގެ އުސޫލަށް ވަނީ މުހިންމު ބަދަލުތަކެއް ގެނެވިފައި ކަަމަށެވެ.
މީގެ އިތުރުން ދައުލަތުގެ ބެލުމުގެ ދަށަށް ނެގިފައިވާ ބައެއް ކުދިން ބައެއް އާއިލާތަކުން މިހާރު ވެސް ފޮސްޓާކުރަމުން ދާއިރު، އެ ފަދަ ކުދިންނަށް އުޖާލާ ދިރިއުޅުމެއް ތަނަވަސްކޮށްދީ، ހަރުދަނާ ޒުވާނުންތަކެއްގެ ގޮތުގައި ބިނާކުރުމަކީ މުޅި ގައުމުގެ ތަރައްގީއަށް ލިބޭ ކުރިއެރުމެއް ކަމަށް ޝިދާތާ ވިދާޅުވިއެވެ.
ސަރުކާރުގެ ސަތޭކަ ދުވަހުގެ ވައުދުތަކުގެ ތެރޭގައި ދިވެހިރާއްޖެއަށް އުފަންވާ ކޮންމެ ކުއްޖަކީ ވެސް ތުއްތު އިރުއްސުރެ އާއިލީ ލޯބި ލިބޭނެ ކުދިންކަން ކަށަވަރުކުރުން ހިމެނެއެވެ. އެހެންކަމުން ދައުލަތުގެ ބެލުމުގެ ދަށަށް ނެގިފައިވާ ބައެއް ކުދިން ބައެއް އާއިލާތަކުން މިހާރު ވެސް ފޮސްޓާކުރަމުން ދާ ކަން ފާހަގަކޮށްލެވެއެވެ.
