ސްރީލަންކާގެ ހުރިހާ ގެއެއް ވަކިވަކިން ބަލާ ފާސްކުރެވިގެންދާނެ ކަމަށް ސްރީލަންކާގެ ރައީސް މައިތްރިޕާލަ ސިރިސޭނާ ވިދާޅުވެއްޖެއެވެ.
އޭޕްރިލް 21 ވަނަ ދުވަހު ސްރީލަންކާގައި ދިން ޓެރަރިސްޓް ހަމަލާތަކާ ގުޅިގެން އަދިވެސް އާންމު މަސްރަހު ހަމައަކަށް އެޅިފައި ނުވާއިރު، ޓެރަރިސްޓުން ހޯދުމަށް ފަށާފައިވާ ބޮޑު އޮޕަރޭޝަންގެ ދަށުން ހުރިހާ ގެއެއް ބަލާ، ފާސްކޮށް، އެ ގެތަކުގައި ދާއިމީކޮށް ދިރިއުޅުމަށް ދަފުތަރުކޮށްފައި ތިބި މީހުން ދެނެގަނެވިގެންދާނެ ކަމަށް ސިރިސޭނާ ވަނީ ވިދާޅުވެފައެވެ.
އާދީއްތަ ދުވަހުގެ ބޮމުގެ ހަމަލާތަކާ ގުޅިގެން، އައިސިސްއާއި ގުޅުން އޮންނަ ކަމަށް ތުހުމަތު ކުރެވޭ 140 މީހަކު ހޯދުމަށް ސްރީލަންކާގައި ވަރުގަދަ އޮޕަރޭޝަނެއް ފަށައިގެން ކުރިއަށްދަނިކޮށް މިރޭވެސް ވަނީ ވަރުގަދަ ހަމަނުޖެހުންގަނޑެއް ހިންގާފައެވެ.
މިހަމަނުޖެހުންތަކުގައި ބަޑީގެ ހަމަލާތަކެއް ބަދަލުކޮށްފައިވާއިރު، މި ކުރިމަތިލުން ހިންގާފައިވަނީ ތުހުމަތުކުރެވޭ ހަނގުރާމަވެރިންތަކެއް ތިބި ސަރަހައްދެއް ރެއިޑްކުރަމުންދިޔަ ދިއުމުގެ ތެރޭގައިކަން ލަންކާ އަސްކަރިއްޔާގެ ތަރުޖަމާނު ވަނީ ކަށަވަރުކޮށްދެއްވާފައެވެ. މި ރެއިޑަކީ ކަލްމުނާއީގެ އަވަށެއްގައި ގޮވިގޮވުމަކާ ގުޅިގެން ހިންގި ރެއިޑެއްކަމަށް ޚަބަރު ލިބެއެވެ.
ސްރީލަންކާގެ މީޑިއާ ރިޕޯޓްތައް ބުނާ ގޮތުގައި ފުލުހުން ރެއިޑްކޮށްފައިވަނީ، ބޮން އުފެއްދުމުގެ މަސައްކަތްކުރަމުންދިޔަ ވަގުތީ ކާރުހާނާއެކެވެ. ރެއިޑުން ފެނުނު ތަކެތީގެ ތެރޭގައި ހައްދުފަހަނައަޅާފައިވާ ހަނގުރާމަވެރި އައިސިސް ޖަމާއަތުން ބޭނުން ކުރަމުން އަންނަ ދިދަ ރަމުޒުވާ ފޮތިގަނޑަކާ، ދަގަނޑު ބޯޅަތަކެއްގެ އިތުރުން، ބޮން ގޮއްވާލުމަށް ބޭނުންކުރާ އާލާތް (ޑެޓަނޭޓާ)ތަކާ، އަމިއްލައަށް މަރުވެގެން ބޮން ގޮއްވާލުމަށްދާ މީހުން އަޅާފައި ހުންނަ ޒާތުގެ ޖެކެޓްތަކެއް ހިމެނެއެވެ.
އާދީއްތަ ދުވަހުގެ ހަމަލާތަކުގެ ތެރެއިން އެންމެ ވަރުގަދަ ހަމަލާ އަމާޒުވި އެއް ތަން ކަމަށްވާ ސެއިންޓް އެންތަނީ ޗާޗު ބަލާލުމުގެ ފުރުސަތު، ހަމަލާއަށް ފަހު ފުރަތަމަ ފަހަރަށް ނޫސްވެރިންނަށް ހުޅުވާލީވެސް މިއަދުގެ ވަގުތެއްގައެވެ. އެ ޗާޗަށް ވަތް ނޫސްވެރިން ކިއާދިން ގޮތުގައި އެތަން އަދިވެސް އޮތީ ސުންނާފަތިވެފައިވާ ހާލުގައެވެ. ބިންމަތީގައި އަދިވެސް ލޭގެ ކޯރުތައް ދެމުންދާފަދައެވެ. ލޭގެ ނިޝާންތައް އަދިވެސް އެ ތަނުގެތެރެއިން ފާޅުވާން ހުރިކަމަށާ، ގޮވިގޮވުމާއެކު އެ ތަން ދޫކޮށް ސަލާމަތްވާން ދުވި މީހުން ދޫކޮށްފައިވާ ދިޔަ ބައެއް ތަކެތިވެސް އެ ތާ ތެރޭގައި ހުރިކަމަށް މީޑިއާ ރިޕޯޓްތައް ބުނެއެވެ.
އާދީއްތަ ދުވަހަކީ ނަސޯރާ ދީނުގެ މީހުން ދީނީ އަޅުމަކަށް ހާއްސަވެގެން ޗާޗުތަކަށް ދުވަހެއް ކަމުގައި ވީ ނަމަވެސް، ވަކި ގޮތަކަށް އަންގަންދެން ޗާޗުތަކުގައި ހާއްސަ ކަމެއް ނޯންނާނެ ކަމަށް ސްރީލަންކާގެ ކަމާ ބެހޭ ފަރާތްތަކުން ވަނީ އަންގާފައެވެ.
