އިއްޔެ ސްރީލަންކާއަށް ދިން ބޮމުގެ ހަމަލާތައް ހިނގި އިރު ވިލާ ކޮލެޖުގެ ލެކްޗަރާއެއް ހުރީ އޭނާގެ އާއިލާއާ އެކު ޝަންގްރިލާ ހޮޓެލްގައެވެ. ސްރީލަންކާއަށް އުފަން ޝާން ޖަޔަސަކޭރާ އަކީ ރާއްޖޭގައި ހުންނަ ވިލާ ކޮލެޖުގެ ވިޒިޓިންގް ލެކްޗަރާއެކެވެ. އޭނާ އަކީ އެ ކޮލެޖުގެ އެކައުންޓިން ފައިނެންސް މެނޭޖްމަންޓް ކިޔަވައި ދެމުންދާ ލެކްޗަރާއެއް ކަމަށް ވިލާ ކޮލެޖުން "ދަ ޕްރެސް" އަށް ވަނީ ކަށަވަރުކޮށް ދީފައެވެ.
ދިވެހިން ވެސް އާންމުކޮށް ސްރީލަންކާއަށް ގޮސް ތިބޭ ތިން ހޮޓަލަކަށް އިއްޔެ ބޮމުގެ ހަމަލާ ދީފައި ވާއިރު ޝަންގްރިއްލާ ހޮޓަލުގައި ޝާން އާއި އޭނާގެ އަންހެނުން ނިސަންގާ މަޔަދުންޏެ ތިބީ ހެނދުނުގެ ނާސްތާ ކުރާށެވެ.
ޝާންގެ އަންހެނުންގެ އާއިލާއާ އެކު ނާސްތާ ކުރަން ތިބިއިރު ނާސްތާ ފެށުމުގެ ކުރިން ނިސަންގާ ފޮޓޯއެއް ނަގުމަށްފަހު ކެޕްޝަންގައި "އީސްޓާ ބްރޭކްފާސްޓް ވިތް ފެމެލީ" ޖަހައި ފޭސްބުކްގައި ވަނީ ޕޯސްޓެއް ކޮށްފައެވެ.
މި ޕޯސްޓަށް ގިނަ ބަޔަކު އަންނަނީ އެ އާއިލާއަށް ތައުޒިޔާގެ މެސެޖްތައް ފޮނުވަމުންނެވެ. މިސެޖްތަކުގެ ތެރޭގައި ޝާންގެ ހާލު ސީރިއަސް ކަމަށް މީހަކު މައުލޫމާތު ދީފައިވެއެވެ. އަދި "ދަ ޕްރެސް" އިން ޝާންއަށް ގުޅަން މަސައްކަތްކޮށްގެން ވެސް އޭނާއަށް ގުޅޭ ގޮތް ވަނީ ނުވެފައެވެ.
ލަންކާގެ ޝަންގްރިއްލާ ހޮޓަލަށް ދިން ހަމަލާގައި ޝާންގެ އަންހެނުންނާއި މައިދައިތަ ނިޔާވެފައިވާ ކަމަށް ސްރީލަންކާގެ ނޫހެއް ކަމަށްވާ ހިރު ނޫހުން މައުލޫމާތު ދެއެވެ. ޝާންގެ މައިދައިތަ ޝާންތާ މަޔަދުންޏެ އަކީ ލަންކާގެ މަޝްހޫރު ސެލެބްރިޓީ ޝެފެކެވެ.
ބޮމުގެ ހަމަލާ އެންމެ ފުރަތަމަ ދީފައިވަނީ ލަންކާ ގަޑިން ހެނދުނު 08:45 ހާއިރު ނިގެންބޯގެ ސެއިންޓް ސާބޭޝިއަން ޗާޗަށެވެ. އޭގެ ފަހުން ޝަންގްރިއްލާ ހޮޓެލް، ސެއިންޓް އެންތަނީ ޝްރައިން، ދަ ކިންގްސްބަރީ ހޮޓެލް، ދަ ސިނަމަން ގްރޭންޑް ހޮޓެލް، އަދި ބަޓިކަލޯއާގެ ޒިއޯން ޗާޗުގައިވެސް ބޮމުގެ ހަމަލާތައް ދީފައި ވެއެވެ.
ބޮމުގެ ހަމަލާތައް ހުއްޓުމަކަށް އައިހެން ހީވި ނަމަވެސް މެންދުރު ވީ ފަހުން ދެހިވަލަ ޒޫ ކައިރީގައި ހުންނަ ޓްރޮޕިކަލް އިން ހޮޓެލްއާއި ޑެމަޓަގޮޑާގެ އަވަށެއްގައިވެސް ބޮމުގެ ހަމަލާތަކެއް ވަނީ ދީފައެވެ.
މިހާދިސާގައި މަރުވި މީހުންގެ އަދަދު 290 އަށް އަރާފައި ވާއިރު އެއްވެސް ދިވެއްސެއްގެ ފުރާނައަށް ނުރައްކާވިކަމުގެ އެއްވެސް ރިޕޯޓެއް އަދި މިހާތަނަށް ލިބިފައެއް ނުވެއެވެ.
ނާސްތާ ނަގާނީތަ ނޫނީ ނާސްތާ ކުރަން ތިބޭނީތަ