ގައިދީންގެ އަދަބު ލުއިކޮށް ދިނުމުގައި ބޮޑަށް ބެއްލެވީ އިންސާފު ލިބުމުގައި ޝަރުއީ ނިޒާމުން ގެއްލިފައި ތިބި މީހުންނަށް ކަމަށް އެމަނިކުފާނުގެ ތަރުޖަމާނު އިބްރާހިމް ހޫދު ވިދާޅުވެއްޖެއެވެ.
މުޖުތަމައަށް ނުރައްކަލެއް ނެތްކަން ކަށަވަރު ކުރުމަށް ފަހު 201 ގައިދީއެއްގެ އަދަބު ރައީސް އިބްރާހިމް މުހައްމަދު ސޯލިހް ލުއިކޮށްދެއްވުމާ ގުޅިގެން ހޫދު ވިދާޅުވީ ސިސްޓަމްތެރޭގާއި ބެދިފައި ތިބޭ މީހުން ގައިދީންގެ ތެރޭގައި އެބަތިބި ކަމަށެވެ.
"އެބަހުރޭ ސިސްޓަމް ތެރޭގައި ބެދިފައި ތިބި މީހުން. އަދަބު ލުއިކޮށްދިންއިރު ބޮޑަށް ބަލާފައި ވަނީ، އާ ގާނޫނުލްއުގޫބާތަށް އަމަލުކުރަން ފެށިއިރު ނިޒާމުން ގެއްލިފައި ތިބި މީހުންނަށް،" ހޫދު ވިދާޅުވިއެވެ.
އަދަބު ލުއިކޮށްދިނުމުން އޭގެ ތެރެއިން ބައެއް މީހުން މިނިވަންވެފައިވާއިރު، އަނެއްބައި މީހުން ގޭ ބަންދަށް ބަދަލު ކޮށްދީފައިވެއެވެ. ދެން ތިބި މީހުންގެ ޖަލު ހުކުމުން ބޮޑު ބައެއް ވަނީ މައާފު ކޮށްދީފައެވެ. މިކަމާ ގުޅޭގޮތުން އިތުރު ތަފްސީލުތަކެއް ހޫދު ނުދެއްވައެވެ.
ހޫދު ވިދާޅުވީ އަދަބު ލުއިކޮށްދިން އެންމެންނަކީ ވެސް ހުކުމުގެ ހަތަރުބައިކުޅަ އެއްބައި ތަންފީޒުކޮށްފައިވާ މީހުން ކަމަށާއި، އެ މީހުންގެ އަދަބު ލުއިކޮށްދިން އިރު، ބަލި ހާލަތާއި ޖަލުގައި އެ މީހެއްގެ އަހުލާގު ހުރި ގޮތާއި ހާއްސަ ހާލަތްތަކަށް ބަލާފައިވާނެ ކަމަށެވެ.
ހަމައެއާއެކު އަދަބު ލުއިކޮށްދިން ގައިދީންގެ ތެރެއިން މަސްތުވާތީގެ މައްސަލައާ ގުޅިގެން ހުކުމް ތަންފީޒްކުރުމުން މިނިވަންވި މީހުން ދިރިއުޅޭ ތަން ދެ އަހަރު ވަންދެން ކޯޓުއަމުރެއް ނެތި ފުލުހުން ބަލާ ފާސްކުރާނެ ކަމަށް ވެސް ހޫދު ވިދާޅުވިއެވެ. އަދި އަދަބު ލުއިކޮށްދޭން ނިންމި މީހުންގެ ތެރޭގައި ޑައިމޯފިން ބޭނުން ކުރުމާއި ވައްކަން ކުރުމާއި ކެނަބިސް އަދި ބަނގުރާ ބޭނުންކޮށްގެން ހުކުމް ތަންފީޒުކުރަމުންދާ މީހުން ހިމެނޭ ކަމަށްވެސް ހޫދު ވިދާޅުވިއެވެ.
