އިގުތިސޯދީ ހަތުރުންގެ ގޮތުގައި އޮތް ޗައިނާއާއި އެމެރިކާއާއި ދެމެދު ކުރިއަށްދާ ވިޔަފާރީގެ މަޝްވަރާތަކުން އެދެވޭ ކުރިއެރުންތަކެއް ހާސިލުކުރެވިފައިވާކަމަށް އެމެރިކާގެ މާލީ ވަޒީރު ސްޓީވަން ނޫޗީން ވިދާޅުވެއްޖެއެވެ.
މިގޮތުން ދެގައުމުގެ މެދުގައި އެކުލަވާލާ އެއްބަސްވުންތަކާ މުއާހަދާތައް ތަންފީޒުކުރެވިގެންދާ ގޮތް ވިލަރެސްކޮށް ބެލެހެއްޓުމަށްޓަކައި ހާއްސަ އޮފީސްތަކެއް ގާއިމުކުރުމަށް އެމެރިކާއާއި ޗައިނާއިން އެއްބަސްވުމަކަށް އައިސްފައިވާކަމަށް އެމެރިކާގެ މާލީ ވަޒީރު ވަނީ ވިދާޅުވެފައެވެ.
ސީއެންބީސީއަށް ދެއްވި ބަސްދީގަތުމެއްގައި އެމެރިކާގެ މާލީ ވަޒީރު އިތުރަށް ވިދާޅުވީ، ޗައިނާގެ ބޮޑުވަޒީރުގެ ނައިބު ލިއު ހީއާއިއެކު ބިނާކުރަނިވި މަޝްވަރާތަކެއް ކުރިއަށް ގެންދެވިފައިވާކަމަށެވެ. ނަމަވެސް އެމެރިކާއާއި ޗައިނާއާއިންވެސް ރިއާޔަތް ކުރަން ޖެހޭ އިތުރު ކަންތައްތަކެއް އެބަހުރި ކަމަށާ، އިތުރު މަޝްވަރާތަކެއް ބުރާސްފަތި ދުވަހުވެސް ކުރިއަށްދާނެ ކަމަށް އެމެރިކާގެ މާލީ ވަޒީރު ވަނީ ވިދާޅުވެފައެވެ.
މިމޭރުމުން ވާހަކަފުޅު ދައްކަވަމުން އެމެރިކާގެ މާލީ ވަޒީރު ވިދާޅުވީ، ވިޔަފާރީގެ ސުލްހައިގެ މަޝްވަރާތަކުގެ ބައެއް ބާބުތައް މުޅިންހެން ނިންމާލެވިފައިވާއިރު، އަނެއް ބައި ބާބުތަކުގައި ފަންނީ މައްސަލަތަކެއް ހުރި ކަމަށެވެ.
ދުނިޔޭގެ އެންމެ ވަރުގަދަ އިގުތިސޯދުގެ ޝަރަފު ދިފާއު ކުރުމަށާ ހޯދުމަށް އެމެރިކާއާއި ޗައިނާއިން ކުރަމުންދާ ވަރުގަދަ "ހަނގުރާމާގައި" ދެ ގައުމުންވެސް ދަނީ އަނެއް ގައުމާއ ދެކޮޅަށް ހަރުކަށި ފިޔަވަޅުތަކެއް ތަންފީޒު ކުރަމުންނެވެ.
