މިއަދު ހަވީރު 6:00 ގެ ފަހުން ރައްޔިތުންގެ މަޖިލީސް އިންތިހާބުގައި ވާދަ ކުރާ އެއްވެސް ކެންޑިޑޭޓަކަށް ތާއީދު ލިބޭ ފަދަ ނުވަތަ ތާއީދު ކުޑަވާ ފަދަ އެއްވެސް ކަމެއް ކުރުން މަނާ ވާނެ ކަމަށް އިލެކްޝަންސް ކޮމިޝަނުން (އީސީ) ން ބުނެފިއެވެ.
އިންތިހާބުގައި ކެމްޕޭނު ކުރުން މަނާ ވަގުތު ތަކާ ގުޅޭ ގޮތުން އީސީން ނެރުނު އިއުލާނުގައި ވާ ގޮތު، މިއަދުން ފެށިގެން މިމަހުގެ 7 ވަނަ ދުވަހުގެ ހެނދުނު 6 ޖެހުމާ ހަމައަށް އިންތިހާބަށް ނުފޫޒު ފޯރާ ފަދަ އެއްވެސް ކަމެއް ކުރުމަކީ މަނާ ކަމެއް ކަމަށް ބުނެފައި ވެއެވެ. އަދި މިފަދަ އެއްވެސް ކަމެއް އެއްވެސް ވަސީލަތެއްގެ އެހީގައި ކުރިއަށް ނުގެން ދިޔުމަށް އެކޮމިޝަނުން އިލްތިމާސް ކޮށްފައި ވެއެވެ.
އިންތިހާބު ތަކާ ބެހޭ އާންމު ގާނޫނުގެ 44 ވަނަ މާއްދާގައި ވާގޮތުން އިންތިހާބެއްގައި ވޯޓުނަގާ ދުވަހުގެ ކުރީ ދުވަހުގެ ހަވީރު 6:00 އިން ފެށިގެން ވޯޓު ނަގާ ދުވަހުގެ ފަހު ދުވަހުގެ ހެނދުނު 6:00 އާ ދެމެދު، ތާއީދު ހޯދުމަށް އެއްވެސް ހަރަކާތެއް ނުވަތަ ތާއީދު ހޯދުމަށް މަގުފަހިވާ ފަދަ އެއްވެސް އަމަލެއް ހިންގުމަކީ މަނާ ކަމެކެވެ.
