ގާނޫނު ތަކުން ބާރު ލިބިގެން ވަކި ކަމެއް ކުރުމަށް މުއައްސަސާތަކެއް ހަދާފައި ހުއްޓާ ހަމަ އެބާރުތައް ދޭ ގޮތަށް ދެވަނަ މުއައްސަސާއެއް ނުހެދޭނެ ކަމަށާ އެކަމަކަށް ގާނޫނު އަސާސީވެސް ޖާގަ ނުދޭ ކަމަށް ރައްޔިތުންގެ މަޖިލީހުގެ ރައީސް އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ރައީސް އިބްރާހިމް މުހައްމަދު ސޯލިހު ރައްޔިތުންގެ މަޖިލީހަށް ހުށަހަޅުއްވާފައިވާ މިނިވަން ކޮމިޝަންތަކުގެ ބިލަށް އިޝާރާތް ކުަރައްވާ ގާސިމް ވިދާޅުވީ ކޮން ބައެއްކަން ނޭނގޭ ބަޔަކު ލައިގެން ކޮމިޝަންތަކެއް ހަދަން ހުށަހަޅުއްވާފައި އޮތަސް އެއީ ކުރެއްވޭނެ ކަމެއް ނޫން ކަމަށެވެ.
ގާނޫނު އަސާސީންވެސް އެޖާގަ ނުދޭ ކަމަށް ވިދާޅުވަމުން، ހަމަ އެއް ކަމެއް ކުރަން ބޮޑެތި މުއައްސަސާތައް ހެދިފައި ހުއްޓާ ފަސް މީހަކު ނުވަތަ ތިން މީހަކު، ނުވަތަ ކާކު ކަމެއްވެސް ނޭނގޭ ބަޔަކު ލައްވައިގެން ކުރައްވަން މިއުޅުއްވަނީ ކޮންކަމެއް ތޯ އައްސަވާ ގާސިމް ވަނީ ރައީސް ސޯލިހުގެ އެ ހުށަހެޅުއްވުމަށް ފާޑު ވިދާޅުވެފައެވެ.
ގާސިމް މިރޭ ވަނީ ރައީސް މުހައްމަދު ނަޝީދަށްވެސް ވަރަށް ބޮޑަށް ފާޑު ވިދާޅުވެފައެވެ. އެގޮތުން އޭނާ ވިދާޅުވީ ބިތްޖެހިފައި ހުންނަވައިގެން ދެއްކެވޭ ނުދެއްކެވޭ ވާހަކަ އެމަނިކުފާނަށް އެނގިވަޑައި ނުގަންނަވާ ކަމަށެވެ. ގާސިމް އިޝާރާތް ކުރެއްވީ، ސަލަފިއްޔާއަށް ކިޔަވަން ދާ މީހުން އެއްޖިންސުން ގުޅުން ހިންގާ ކަމަށް ރައީސް ނަޝީދު ދެއްކެވި ވާހަކައަށެވެ.
ސަލަފިއްޔާއަކީ ގަދަރު ލިބިގެންވާ އިނިސްޓިޓިއުޓެއް ކަމަށް ވިދާޅުވަމުން، އެތަނުން ކިޔަވައިގެން ބޭރުގެ އެހެން ތަންތަނަށް އެތައް ބަޔަކު ކިޔަވަން ދާކަމަށް ވިދާޅުވެ، އެތަނުން ކިޔަވާ މީހުން އެއްޖިންސުން ގުޅުން ހިންގަނީ އޭ ވިދާޅުވެ ނަޝީދު މި ދައްކަނީ ކޮން ކަހަލަ ވާހަކަ އެއް ތޯ ވެސް ގާސިމް ވަނީ ސުވާލު އުފައްދަވާފައެވެ.
މިފަހަކަށް އައިސް ގާސިމް އާއި ރައީސް މުހައްމަދު ނަޝީދު ގެންދަވަނީ އެއްބޭފުޅަކު އަނެއް ބޭފުޅަކަށް ބަހުގެ ހޫނު ހަމަލާތައް ދެއްވަމުންނެވެ.
އަދި ޖުމްހޫރީ ޕާޓީ ކޯލިޝަންގައި އޮވެ އިދިކޮޅު ފަރާތްތަކާ ގުޅިގެން މަޖިލީސް އިންތިހާބު ކާމިޔާބު ކުރުމަށް ކުރާ މަސައްކަތުގެ ސަބަބުން އެދެފަރާތުގެ ނުތަނަވަސްކަން ވަނީ ބޮޑުވެފައެވެ.
