އިސްލާމީ ޝަރީއާގެ ހުކުމްތަކާއި އެއްގޮތަށް ބުރޫނާއީގެ ގާނޫނުލްއުޤޫބާތަށް އިސްލާހު ގެނެސް، އޭޕްރިލް މަހުގެ 3ވަނަ ދުވަހުން ފެށިގެން ހުކުމްތައް ތަންފީޒު ކުރަން ފެށި ފެށުން ނިމުމަކަށް ގެނައުމަށް އދގެ ޓީމަކުން ގޮވާލައިފިއެވެ.
ދިވެހިރާއްޖޭގައި ހާރިޖީ ވަޒީރުކަންވެސް ކުރައްވާފައިވާ އދގެ މިހާރުގެ ސްޕެޝަލް ރެޕަޓުއާ އޮން ފްރީޑަމް އޮފް ރިލިޖަން އޯ ބިލީފް، ޑރ އަޙުމަދު ޝަހީދުވެސް ހިމެނިވަޑައިގަންނަވާ ޓީމަކުން އާންމު ކޮށްފައިވާ ބަޔާނުގައި، އިސްލާމީ ޝަރީއާއާއި އެއްގޮތަށް ބުރޫނާއީގެ ގާނޫނޫލްއުޤޫބާތަށް ގެނައި އިސްލާހަކީ، ބައިނަލްއަގުވާމީ އިންސާނީ ހައްގުތަކުގެ ގާނޫނާ ފުށޫ އަރާ އިސްލާހުތަކެއް ކަމަށް ބުނެ، އެ އިސްލާހުތައް މިހާރުން މިހާރަށް ބާތިލު ކުރުމަށް ބުރޫނާއީއަށް ވަނީ ގޮވާލާފައެވެ.
ކައިވެނި ކުރުމަށްފަހު ކައިވެނިން ބޭރުން ޒިނޭކުރާ މީހުންނާ އެއްޖިންސުން ގުޅުން ހިންގާ މީހުން ރަޖުމު ކޮށްގެން މެރުމަށާ، ވައްކަން ކުރާ މީހާގެ އަތްކެނޑުމުގެ އިތުރުން ގަސްތުގައި ދަރިވައްޓާލާ މީހުންގެ ގައިގައި ހައްދު ޖެހުން ފަދަ އަދަބުތައް ދިނުމަކީ ލާއިންސާނީ، ދަށުދަރަޖައިގެ އަދަބުތަކެއް ކަމަށް ސިފަކޮށް، އދގެ ޓީމުން ވަނީ ބުރޫނާއީގައި ބުދަ ދުވަހު ތަންފީޒު ކުރަން ފެށި އިސްލާމީ ޝަރީއާގެ ގާނޫނޫލްއުޤޫބާތަށް ވަރަށް ބޮޑަށް ފާޑުކިއާފައެވެ.
ކަންމިހެން އޮތްއިރު، މި ބަޔާން އާންމު ކުރައްވާ ޑރ ޝަހީދު ސޯޝަލް މީޑިއާގައި ކުރެއްވި ޕޯސްޓަކާ ގުޅިގެން ގިނަ ބަޔަކު ދަނީ އދގެ ޓީމަށް ފާޑުކިއުންތައް އަމާޒު ކުރަމުންނެވެ.
