25 އަހަރުގެ ޖަލު ހުކުމާ ގުޅިގެން ލިބުނު ގެއްލުމުގެ ބަދަލު ހޯދުމަށް، ދިއްގަރު ދާއިރާގެ ކުރީގެ މެންބަރު އަހުމަދު ނާޒިމް، ސިވިލް ކޯޓަށް ހުށައެޅި މައްސަލަ ބަލައި ނުގަނެ، ކޯޓުން ބޭރު ކޮށްލައިފިއެވެ.
މަކަރާއި ހީލަތް ހެދުމުގެ ކުށުގައި 25 އަހަރަށް ޖަލަށް ލުމަށް ސުޕްރީމް ކޯޓުން، އޭނާގެ މައްޗަށް ހުކުމް ކުރީ 2015 ވަނަ އަހަރުގައެވެ. އެކަމަކު އެ ހުކުމް ރިވިއު ކުރަން، ނާޒިމްގެ ފަރާތުން ހުށަހެޅުމުން، ސުޕްރީމް ކޯޓުން ވަނީ އެ ހުކުމް ބާތިލު ކޮށްފައެވެ.
އެ މައްސަލައިގައި ބަދަލު ހޯދުމަށް ސިވިލް ކޯޓަށް ނާޒިމު ހުށައެޅީ މިދިޔަ ހަފްތާގެ ތެރޭގައެވެ. އެ މައްސަލައިގާ ނާޒިމް ބުނެފައިވަނީ، ޖަލު ހުކުމުގެ ސަބަބުން ގެއްލުނު، މެމްބަރު ކަމުގެ މުސާރައާއި އިނާޔަތްތަކާއި ޕެންޝަން ދައުލަތުގެ ފަރާތުން ހޯދުމަށާއި، ނާޒިމަށް ލިބުނު އެހެނިހެން ގެއްލުމުގެ ބަދަލު ހޯދުމުގެ ހައްގު އޮތް ކަމަށް ކަނޑައަޅައި ދެއްވުމަށެވެ.
ސިވިލް ކޯޓުން ނާޒިމުގެ މައްސަލަ ބޭރު ކޮށްލީ އެ ކޯޓަށް އެ މައްސަލަ ބެލުމުގެ އިހްތިސާސް ލިބިފައި ނުވާތީއެވެ. ކޯޓުތަކުން ނިންމާ އެއްވެސް ނިންމުމަކާ ގުޅޭ ގޮތުން ބަދަލު ހޯދުމަށް ހުށަހަޅާ މައްސަލަތައް ބެލުމުގެ އިހްތިސާސް އެ ކޯޓަށް ނޯންނާނެ ކަމަށް ސިވިލް ކޯޓުގެ ރަޖިސްޓްރާ ނިންމާފައި ވަނީ މިދިޔަ ފެބްރުއައީ މަހުގައެވެ.
ދިއްގަރު ދާއިރާގެ ގޮނޑި ނާޒިމު އަށް ގެއްލުމުން، މަޖިލީހުގައި މިހާރު އެ ދާއިރާ ތަމްސީލު ކުރައްވަމުން ގެންދަވަނީ، ކުރީގެ ރައީސް މައުމޫން އަބްދުލްގައްޔޫމް ގެ ދަރިކަލުން ފާރިސް މައުމޫނެވެ.
