ފެބުރުވަރީ މަހުގެ 'ޕުލްވާމާ ހަމަލާ'އާއި ގުޅިގެން ޕާކިސްތާނުގެ ހަނގުރާމަވެރި ޖަމާއަތެއް ކަމަށް ބުނާ ޖާއިޝީ މުޙައްމަދާ ބެހޭ ގޮތުން އިންޑިއާއިން ތައްޔާރުކޮށްފައިވާ ލިޔެކިއުންތައް ބަލައިގަތުމަށް ޕާކިސްތާނުން އިންކާރު ކުރުމާއެކު، އެކަމާ ހިތާމަ ކުރާ ކަމަށް އިންޑިއާއިން ބުނެފިއެވެ.
މި ލިޔެކިއުންތައް ބަލައިގަތުމަށް ޕާކިސްތާނުގެ ސަރުކާރުން އިންކާރު ކުރި ކުރުމަކީ، 'ޕުލްވާމާ ހަމަލާ'އަކީ ޓެރަރިޒަމްގެ އަމަލެއް ކަމުގައި ބަލައިގަތުމަށް ޕާކިސްތާނުގެ ސަރުކާރު އިންކާރު ކުރުން ކަމަށް އިންޑިއާއިންވަނީ ބުނެފައެވެ.
ޕާކިސްތާނުން ބުނީ، ޕާކިސްތާނުގައި ޓެރަރިސްޓުން ހަރަކާތްތެރިވާނަމަ އެފަދަ ފަރާތްތަކަކާ ދެކޮޅަށް އެޅި ފިޔަވަޅެއް ނުވަތަ ފިޔަވަޅެއް އެޅިކަންވެސް އިންޑިއާއަށް އަންގާފައި ނުވާނެ ކަމަށެވެ.
އިންޑިއާ ސަރުކާރުން ބުނީ، 'ޕުލްވުމާ ހަމަލާ'އާއި ގުޅޭ ލިޔެކިއުންތައް ބަލައިގަތުމަށް ޕާކިސްތާނުން އިންކާރު ކުރުމަކުން ހައިރާން ނުވާ ކަމަށާ، 2008 ވަނަ އަހަރު މުމްބާއީ އަށާ، 2016 ވަނަ އަހަރު ޕަތަންކޮޓަށް ދިން ހަމަލައާއި ގުޅިގެންވެސް ޕާކިސްތާނުން ދައްކަމުން އައި އެއްވާހަކައެއް ކަމަށެވެ. ޕާކިސްތާނުގައި ހަރަކާތްތެރިވާ ޓެރަރިސްޓް ޖަމާއަތްތަކާ ބެހޭ މައުލޫމާތު ޚުދު އެ ގައުމުގެ ސަރުކާރަށްވެސް ނޭނގޭ ކަމަށް އިންޑިއާގެ ސަރުކާރުން ވަނީ ތުހުމަތު ކޮށްފައެވެ.
'ޕުލްވަމާ ހަމަލާ'އާއި ގުޅިގެން އިންޑިއާއިން ކުރިއަށް ގެންދިޔަ ތަހުގީގު ވަގުތީ ރިޕޯޓް ޕާކިސްތާނާ ހިއްސާކޮށްފައިވާއިރު، 91 ސޮފުހާގެ ރިޕޯޓްގައިވާ ވާހަކަތައް ބަލައިގަތުމަށް ޕާކިސްތާނުން ވަނީ އިންކާރުކޮށްފައެވެ. އަދި އޭގައިވާ ވާހަކަތަކަކީ ޕާކިސްތާނާ އެއްވެސް ގުޅުމެއް ހުރި ވާހަކަތަކެއް ކަމުގައި ޕާކިސްތާނުން ނުދެކޭ ކަމަށްވެސް އެގައުމުން ވަނީ ބުނެފައެވެ. މީގެ އިތުރުން ޕާކިސްތާނުގައި ޓެރަރިސްޓުން ހަރަކާތްތެރިވަމުންދާ 22 ކޭމްޕެއް ޗާޓު ކުރަހައިގެން އިންޑިއާއިން ފާހަގަކޮށްފައިވާއިރު، އެކަން އޮތީ އެހެން ނޫންކަމަށް ޕާކިސްތާނުގެ ހާރިޖިއްޔާއިންވަނީ ބުނެފައެވެ.
ޕާކިސްތާނު ހާރިޖިއްޔާއިން ބުނީ ހައްޔަރުކޮށްފައިވާ 54 މީހުންގެ ތަހުގީގު ހިންގާ ލިބިފައިވާ މައުލޫމާތަށް ބަލާއިރު 'ޕުލްވާމާ ހަމަލާ'އާއި ގުޅުވެން ނެތްކަމަށާ، އިންޑިއާއިން ފާހަގަކޮށްފައިވާ 22 ސަރަހައްދުގައި ޓެރަރިސްޓު ކޭމްޕުތަކެއް ނުހިނގާ ކަމަށެވެ.
ކަޝްމީރުގެ އިންޑިއާއާއި ވީ ފަޅީގައި އޮތް ޕުލްވާމާގައި، ހަނގުރާމަވެރިއަކު އަމިއްލައަށް މަރުވެގެން ދިން ބޮމުގެ ހަމަލާގައި އިންޑިއާގެ 40 އަށްވުރެ ގިނަ ޕެރާމިލިޓްރީ ފުލުހުންގެ ފުރާނަ ވަނީ ގެއްލިފައެވެ. ފެބުރުވަރީ މަހުގެ 14 ވަނަ ދުވަހުގެ ހަމަލާ ދީފައިވަނީ ޖާއިޝީ މުޙައްމަދު ނަމަކަށް ކިއާ ހަނގުރާމަވެރި ޖަމާއަތަކަށް ނިސްބަތްވާ ހަނގުރާމަވެރިއެއްކަމަށާ، އެ ޖަމާއަތަކީ ޕާކިސްތާނުގައި އޮޕަރޭޓްކުރާ ޓެރަރިސްޓް ޖަމާއަތެއް ކަމަށް އިންޑިއާއިން ބުނާއިރު، ޕާކިސްތާނުގެ ސަރުކާރުން ދަނީ ޕުލްވާމާ ހަމަލާގައި ޕާކިސްތާނުގެ އަތެއް ވާކަމަށް އިންޑިއާއިން ކުރަމުންދާ ތުހުމަތުތަކަށް އިންކާރު ކުރަމުންނެވެ.
