އެއްފަހަރު ބޭނުންކުރުމަށްފަހު އުކާލާ ޕްލާސްޓިކް ބޭނުން ކުރުން މަނާކުރާ ގާނޫނު ފާސްކުރުމަށް ވިލާތުގެ އިއްތިހާދު (އީޔޫ)ގެ ގާނޫނު ހަދާ މަޖިލީހުން ތާއިދުކޮށްފިއެވެ.
ޕްލާސްޓިކުން އުފައްދާ ހޮޅިއާ، ސަމުސަލާ އުލުގެ އިތުރުން ވަޅިއާއި، ކޮޓަން ބަޑް ފަދަ ތަކެތި އުފައްދާ، ބޭނުންކުރުން މަނާކުރާ ގާނޫނު ފާސްކުރުމަށް 560 ވޯޓު ދީފައިވާއިރު، އެ ގާނޫނު ފާސްކުރުމާ ދެކޮޅަށް ދީފައިވަނީ 35 ވޯޓެވެ.
މި ގާނޫނަނަކީ އިޔާދަކުރަނިވި ވެއްޓަކަށް ދުނިޔެހެދުމަށް ކުރަމުންދާ މަސައްކަތުގެ ތެރެއިން ރީސައިކަލް ކުރުމަށް ނުވަތަ އަލުން ބޭނުން ކުރެވޭނެ ގޮތް ހެދުމަށް، އުފެއްދުންތެރިކަމުގެ ސިނާއަތުގައި މަސައްކަތްކުރާ ފަރާތްތަކަށް ބާރުއެޅުމުގެ ގޮތުން އެކުލަވާލާފައިވާ ގާނޫނެކެވެ.
މި ގާނޫނަށް އަމަލުކޮށް، ތަންފީޒުކުރަން ފަށަން ހަމަޖެހިފައިވަނީ 2021 ވަނަ އަހަރުއެވެ.
ވިލާތުގެ އިއްތިހާދުން ފާސްކުރި ގާނޫނުން މަނާކުރާ އިތުރު އައިޓަމްތަކުގެ ތެރޭގައި ޕްލާސްޓިކް ތައްޓާ، ކާބޯތަކެތި ރައްކާކުރަން ގެންގުޅޭ ޕުލާސްޓިކް ކޮންޓޭނަރާ، ފުއްޕާހަންވެސް ހިމެނެއެވެ. މި ގާނޫނު ބުނާ ގޮތުން، ދެމެހެއްޓެނިވި ވަސީލަތްތަކެއް ބޭނުންކޮށްގެން، ޕްލާސްޓިކާއި ދުރުވާނެ ގޮތްތައް ހޯދަންޖެހޭނީ މެމްބަރުން ގައުމުތަކުންނެވެ.
ޕްލާސްޓިކް ބޭނުންކުރަންޖެހިއްޖެ ހާލެއްގައިވެސް އެ ބޭނުންކުރާ ފުޅިފަދަ އެއްޗެއްގެ %90 އިންސައްތަ، 2029 ވަނަ އަހަރު އަންނަންއިރު ރީސައިކަލް ކުރެވެންޖެހޭނެކަމަށްވެސް މި ގާނޫނު ލާޒިމުކުރެއެވެ. މީގެ އިތުރުން، އެންމެ ގިނަ ވަމުން އަންނަ ޕްލާސްޓިކްގެ ބާވަތެއް ކަމަށްވާ ސިނގިރޭޓްގެ ފިލްޓަރު (ސްޓަބް) ނައްތާލުމަށް ހިނގާ ހަރަދު ދައްކަންޖެހޭނީ ، ސިނގިރޭޓު އުފައްދާ ކުންފުނިތަކުން ކަމަށްވެސް މި ގާނޫން ވަނީ ލާޒިމުކޮށްފައެވެ.
