މިޔަންމާގެ ސަރުކާރާ އަސްކަރިއްޔާއިން ހިންގަމުންދާ ލާއިންސާނީ ޖަރީމާތަކަށް އެއްބާރުލުންދީ އެކަމަށް ހިތްވަރުދިނުމުގެ ރޫހު ޕްރޮމޯޓްކުރުމަށް މިޔަންމާއަށް އެއްބާރުލުންދޭ ކުންފުނިތަކެއްގެ ނަންތައް ހިމަނައިގެން ބާމާ ކެމްޕެއިން ޔޫކޭއިން ތައްޔާރުކޮށްފައިވާ "މުޑުދާރު ލިސްޓު" އާންމުކޮށްފިއެވެ.
އިންސާނީ ހައްގުތަކަށް މަސައްކަތްކުރާ މި ޖަމިއްޔާއިން އާންމުކޮށްފައިވާ ލިސްޓުގައި ވިލާތުގެ ގައުމުތަކުގެ އިތުރުން އެމެރިކާ، އިންޑިއާ އަދި ޗައިނާގެ ކުންފުނިތަކެއްވެސް ހިމެނެއެވެ.
ބާމާ ކެމްޕެއިން ޔޫކޭގެ ޑައިރެކްޓާ މައިކް ފާމޭނާ ވިދާޅުވީ "މުޑުދާރު ލިސްޓު"ގެ ނަމުގައި މިފަދަ ލިސްޓެއް އެކުލަވާލުމުގެ މަގުސަދަކީ، އިންސާނީ ހައްގުތަކަށް ނުރައްކާވާފަދަ މަޝްރޫއުތަކާ އަސްކަރިއްޔާއެކު ވިޔަފާރީގެ މުއާމަލާތްތައް ކުރާ ކުންފުނިތަކުގެ ނަންތައް އާންމުކޮށް އެފަދަ ކުންފުނިތައް "ލަދުގެންނެވުން" ކަމަށެވެ.
މިލިސްޓުގައި އެކުލެވޭ ނަން މަޝްހޫރު ބޮޑެތި ކުންފުނިތަކުގެ ތެރޭގައި ވެސްޓާން ޔޫނިއަންއާއި ފޭސްބުކްވެސް ހިމެނެއެވެ.
މިޔަންމާގެ އަސްކަރިއްޔާއާއި ސަރުކާރަކީ، ރޯހިންޏާ ދަރިކޮޅުގެ މުސްލިމުންނާ ދެކޮޅަށް ގަތުލުއާންމުގެ ޖަރީމާ ހިންގިކަމުގެ ތުހުމަތުގައި ބެދިފައިވާ ސަރުކާރަކާ އަސްކަރިއްޔާއެކެވެ.
