އެމްޑީޕީން 19 ވަނަ ރައްޔިތުންގެ މަޖިލީހަށް ހުށަހަޅަން ތައްޔާރު ކޮށްފައިވާ "އެޖެންޑާ19" ގެ ދަށުން ރިސޯޓުތަކުގައި މަސައްކަތްކުރާ ފިރިހެން މުވައްޒަފުންނަށް، އެމީހުންގެ އަނބިން ކައިރީގައި ރޭ ކުރެވޭނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ ހުވަދުއަތޮޅުގެ ދާއިރާތަކަށް އެމްޑީޕީން ވާދަކުރާ ކެންޑިޑޭޓުންގެ ކެމްޕޭން ފެށުމުގެ ގޮތުން ތިނަދޫގައި ބޭއްވި ޖަލްސާގައި ވާހަކަ ދައްކަވަމުން ނަޝީދު ވިދާޅުވީ ބޭނުންފުޅުވަނީ ހަމަޖެހޭ ދިރިއުޅުމެއް ދިވެހިންނަށް ހޯއްދަވައި ދެއްވުން ކަމަށެެވެ. އަދި އެމްޑީޕީ އަބަދުވެސް މަސައްކަތް ކުރަނީ އެ އަމާޒަށް ކަމަށާއި، އިރާދަކުރެއްވިއްޔާ ދަތުރު ފަތުރު ކުރުމުގެ ނިޒާމް ފުރިހަމަ ކުރުމާއި އަދި މަސައްކަތް ކުރާ މީހުން އޮފް ޑިއުޓީގައި ގެއަށް އާދެވުމުގެ ފުރުސަތު ހޯދައި ދިނުމާ އެކީގައި، ފިރިން ނިދަން ގެއަށް އާދެވޭ ގޮތް ހައްދަވައި ދެއްވާނެ ކަމަށް ނަޝީދު ވިދާޅުވިއެވެ.

"އެޖެންޑާ19 ގެ ދަށުން، ތިބޭފުޅުންނަށް ފިރިންނާ އެކީގައި އިރާދަކުރެއްވިއްޔާ ރޭ ކުރެވޭނެ" ނަޝީދު ވިދާޅުވިއެވެ.

މީގެ ކުރިން ވެސް ބައެއް ޕޯޑިއަމްތަކުގައި ނަޝީދު ވަނީ ރަށާ ކައިރި ރިސޯޓުތަކުގައި މަސައްކަތް ކުރާ ފިރިހެން މުވައްޒަފުންނަށް ރޭގަނޑު ރަށަށް އައިސް އާއިލާއެކު ވަގުތު ހޭދަ ކުރެވޭނެ ގޮތް ހައްދަވައި ދެއްވާނެ ކަމަށް ވިދާޅުވެފައެވެ. އެގޮތުން ރިސޯޓްތަކުގައި މަސައްކަތް ކުރާ މުވައްޒަފުން އާއިލާ އާއި ވަކިން ދިރިއުޅެން ޖެހުމަކީ ވަރަށް ބޮޑު މައްސަލައެއްކަން ފާހަގަ ކުރައްވާ ނަޝީދު ވަނީ ކޮންމެ ދުވަހަކު ރިސޯޓްގައި މަސައްކަތް ކޮށްފައި އާއިލާ ކައިރިއަށް އާދެވޭނެ ގޮތައް ފެރީތައް ބާއްވަވާނެ ކަމަށް ވިދާޅުވެފައެވެ.

އެމްޑީޕީން މީގެ ކުރިން ހިންނަވަރުގައި ބޭއްވި ޖަލްސާއެއްގައި ވެސް ނަޝީދު ވިދާޅުވެފައި ވަނީ ރިސޯޓްތަކުގައި މަސައްކަތް ކުރާ މުވައްޒަފުން އާއިލާ އާއި ވަކިން ދިރިއުޅެން ޖެހުމަކީ ވަރަށް ބޮޑު މައްސަލައެއް ކަމަށެވެ. އަދި މަޖިލިސް 19 އިން ފިރިން އާއިލާ އާއި އެކު ކޮންމެ ރެޔަކު ނިދާނެ ވިސްނުމެއް، އުސޫލެއް ތައާރަފް ކުރައްވާނެ ކަމަށާއި، ކޮންމެ ދުވަހަކު ރިސޯޓްގައި މަސައްކަތް ކޮށްފައި އާއިލާ ކައިރިއަށް އާދެވޭނެ ގޮތައް ފެރީތައް ބާއްވަން ޖެހޭ ކަމަށް ނަޝީދު ވިދާޅުވިއެވެ. އެ ޖަލްސާގައި ނަޝީދު ވިދާޅުވީ 1800ގެ އަހަރުތަކުގެ ސިނާއީ މަސައްކަތް ކުރި ގޮތަށް މިހާރު މަސައްކަތް ކުރެވެން ނެތް ކަމަށެވެ.

ސިޔާސީ